VOV4.Êđê- Ti anăp klei mâo dleh dưi ksiêm dlăng mơ̆ng klei ruă Covid 19, hlăk êpul mnuih mơ̆ng dŭm alŭ wăl krĭng kwar Dhŭng dôk “Kluh wĭt”. Anôk gĭt gai hdră gang mkhư̆ klei ruă tưp čar Gia Lai dôk hluê ngă leh kjăp hdră  gang mkhư̆, djŏ hŏng klei dôk bluh mâo mơ̆ng klei ruă.

Dŭm hruê êgao, ti anôk ksiêm dlăng klei ruă tưp Covid-19 êlan dơ̆ng mrô 14, găn ti kban 110, să Ia Le, kdriêk Čư̆ Pưh čar Gia Lai, tŭ drông leh lu êdi mnuih ƀuôn sang, êdeh êdâo. Dŭm čô anei jing lu mnuih mơ̆ng dŭm čar krĭng dhŭng wĭt kơ alŭ wăl pô. Grăp hruê, anôk ngă bruă anei ksiêm dlăng leh êbeh 1000 čô mnuih. Čiăng rơ̆ng kơ klei êrô êbat ti êlan dơ̆ng prŏng lehanăn dưi ksiêm dlăng kjăp klei ruă tưp. Čar Gial Lai tiŏ nao leh dŭm čô nao mdrao lehanăn kahan ksiêm hlăm êlan klông, ngă bruă dăp êlan nao, mtô mnuih ƀuôn sang dăp pruê̆, mkă hnơ̆ng hlơr asei mlei lehanăn hưn mdah klei suai pral hmar hĭn. Kyua ngă jăk bruă dăp êlan nao, bi ktlah mơ̆ng kang êlan, anôk bruă ksiêm dlăng ti kban 110 čar Gia Lai dưi hmao ƀuh hnưm dŭm čô mâo klei ruă tưp Covid-19. Trung tá Nguyễn Minh Tuấn, khua êpul kahan ksiêm mrô 1, kahan ksiêm čar Gia Lai ngă bruă ti nei brei thâo:

“Hmei tiŏ nao leh jih jang êpul êya čiăng ngă kjăp bruă gang mkhư̆ klei ruă tưp Covid-19, čiăng amâo mâo ôh klei đuôm hĕ sa anôk, êpul êya bruă mdrao mgŭn lŏ tiŏ nao lu mnuih ngă bruă, čiăng mâo klei êđăp ênang êjai êrô êbat lehanăn ba mnuih nao bi ktlah.”

Êpul kahan ksiêm ti anôk gak ktuê dlăng klei ruă tưp ti kban 110 , să Ea Le, kdriêk Čư̆ Pưh ktrâo lač kơ mnuih ƀuôn sang hưn klei suaih pral

Siu Y Ƀĕ, k’iăng khua bruă sang čư êa kdriêk Čư̆ Pưh, čar Gia Lai brei thâo, alŭ wăl ngă leh bruă bi mguôp dŭm êpul êya hŭidah mâo klei suăi kơ mnuih ƀuôn sang găn anôk ksiêm dlăng anei.

“Ênoh mnuih wĭt jing lu êdi, tơdah ngă bruă amâo hmar srăng mâo klei hmăi kjham. Khădah hmei ăt mđĭ ai mnuih ƀuôn sang, mâo klei hơĭt hlăm ai tiê, dăp pruê̆ lehanăn hưn mdah klei suaih prăl djŏ hŏng hdră bhiăn, amâo dêč đuê̆ hlăm dŭm êlan čŏng pŏk, êlan điêt, tlĕ găn anôk ksiêm dlăng lehanăn hưn mdah klei suaih pral sĭt, bi ktlah djŏ hŏng dŭm hdră bhiăn.”

Leh dưi mbha êlan, mnuih ƀuôn sang tuôm bi tuôm hŏng phung djŏ klei ruă dưi ba mtam ti anôk bi ktlah hjăn hluê si hdră kčah

Mơ̆ng hruê 26/4 truh kơ akŏ hruê kăm anei, čar Gia lai mâo giăm 30 čô mnuih mâo klei ruă tưp Covid-19. Êpul êya ngă bruă nao cuăl krĭng, tui duah dŭm čô djŏ tuôm hŏng klei mjêč, ksiêm mkă kman kơ dŭm čô djŏ tuôm hŏng mnuih ruă mrâo. Mbĭt hŏng anăn, alŭ wăl lŏ wĭt ngă bruă 21 anôk bi ktlah mbĭt, hŏng hnơ̆ng dưi bi ktlah hlăm brô 3000 čô mnuih, 48 anôk mkăn ăt dôk dưi ksiêm dlăng, mprăp dŭm klei găl dưi bi ktlah thiăm hlăm brô 7000 čô mnuih.

Aduôn Nguyễn Thị Thanh Lịch – K’iăng khua bruă sang čư̆ êa čar Gia Lai, k’iăng khua êpul gĭt gai bruă gang mkhư̆ klei ruă tưp Covid-19 čar Gia Lai Brei thâo, mdrơ̆ng hŏng dŭm hnơ̆ng klei ruă, čar Gia lai mâo leh hdră êlan mkăp brei dŭm mnơ̆ng yua mjêč, bi hluh êlan nao ba čhĭ boh mnga bruă lŏ hma. Bi kơ dŭm anôk mdrao mgŭn, čar Gia Lai bi klă ba yua sang êa drao ti mrô sang 331 êlan Phạm Văn Đồng, ƀuôn prŏng Pleiku hŏng 100 boh jhưng đih ngă bruă mdrao kơ dŭm čô mnuih ruă kjham. Dŭm sang êa drao hnak, sang êa drao mdrao kơ ksŏ, sang êa drao mdrao hŏng knhuah đưm lehanăn krŭ wĭt klei kpư̆ mgei msĕ hŏng êlâo ti ƀuôn prŏng Pleiku ăt dôk mprăp dŭm klei găl hlăm bruă mdrao mgŭn kơ dŭm čô đing mâo klei ruă tưp Covid-19 êdu amâo dah man dưn.

“Hmei rŭ mdơ̆ng leh dŭm sang êa drao čiăng mdrao klei ruă tưp Covid-19, mâo ênŭm klei găl dưi mdrao kơ dŭm čô mâo klei êka ti tač, grep mtuôp (boh ƀleh), mdrao klei ruă mơ̆ng êlâo. Mkŏ mjing dŭm anôk bruă thơ̆ng kơ bruă krŭ wĭt ai ktang kơ dŭm čô mnuih mâo klei ruă kjham, mdrao ktlah hjăn. Êngao kơ anăn hmei lŏ rŭ mdơ̆ng dŭm sang êa drao mdrao kơ dŭm čô mnuih mâo klei ruă êdu.”

Pô mblang: Y-Ƀel Êban