VOV4.Êđê- Mmăt mbruê 25/7, êpul gĭt gai bruă gang mkhư̆ klei ruă tưp Covid-19 čar Gia Lai hưn mthâo, knŭk kna lehanăn phŭn bruă mdrao mgŭn srăng mkăp brei êbeh 1,6 êklăk hnơ̆ng vaccine kơ čar Gia Lai mơ̆ng ară anei truh kơ knhal jih thŭn. Sơ anăn alŭ wăl anei srăng ngă bruă tlŏ mgang kơ 92% ênoh mnuih ƀuôn sang mơ̆ng 18 thŭn kơ dlông. Klă klơ̆ng, hlăm mlan 7, čar Gia Lai tlŏ mgang leh 150 êbâo hnơ̆ng vaccine kơ dŭm êpul mnuih tal êlâo hĭn.

Mơ̆ng mlan 8 truh kơ mlan 12, alŭ wăl lŏ tŭ mă 1,6 êklăk hnơ̆ng vaccine lehanăn tlŏ kơ mnuih ƀuôn sang mơ̆ng 18 thŭn kơ dlông, hlăm brô 92% ênoh mnuih ƀuôn sang hlăk 18 thŭn kơ dlông. Ăt hlăm mmăt mbruê, êpul gĭt gai bruă gang mkhư̆ klei ruă tưp Covid-19 čar Gia Lai hưn mthâo, alŭ wăl anei lŏ mâo sa čô mâo klei ruă tưp Covid-19, jing mô̆ sa čô knuă druh ti mặt trận ƀuôn hgŭm Tây Sơn (Pleiku), mđĭ ênoh mnuih mâo klei ruă tưp hruê mbruê jing 4 lehanăn ênoh mnuih mâo klei ruă tưp hlăm čar đĭ 26 čô.

Pô mblang: Y-Ƀel Êban