VOV4.Êđê- Hruê mbruê, knơ̆ng bruă mdrao mgŭn čar Gia Lai ngă leh bruă mă mta ksiêm mkă kman lehanăn Tlŏ vaccine gang mkhư̆ klei ruă tưp Covid-19 aruăt tal 2 kơ phung mgăt êdeh ti ƀuôn prŏng Pleiku. Bruă mă mta ksiêm mkă kman lehanăn tlŏ vaccine dưi mkŏ mjing hlăm wưng ƀuôn prŏng Pleiku dôk ngă klei bi kbưi yang ƀuôn tui si asăp mtrŭn mrô 16 mơ̆ng khua knŭk kna. Kyuanăn, grăp bruă gang mkhư̆ klei ruă tưp hlăm anôk ksiêm mkă kman lehanăn tlŏ vaccine dưi ngă ktang phĭt. Phung mgăt êdeh ngă djŏ sơăi bruă hưn mdah klei suaih pral, mkă hnơ̆ng hlơr asei, mdjiê kman lehanăn dôk bi kbưi tui si klei mtô mơ̆ng anôk bruă mdrao mgŭn. Leh kơ bruă ksiêm mkă kman lehanăn rơ̆ng klei êđăp ênang, phung mgăt êdeh dưi tlŏ aruăt tal 2 vaccine gang mkhư̆ klei ruă tưp Covid-19. Mĭn tĭng mơ̆ng hruê mbruê truh kơ jih hruê anei. Anôk bruă ksiêm dlăng klei ruă tưp čar Gia Lai bi mguôp hŏng anôk bruă mdrao mgŭn ƀuôn prŏng Pleiku ngă bruă mă mta ksiêm mkă kman lehanăn tlŏ mgang aruăt tal 2 vaccine gang mkhư̆ klei ruă tưp Covid-19 kơ êbeh 700 čô mgăt êđeh dôk mă bruă ti ƀuôn prŏng Pleiku.

Pô mblang: Y-Ƀel Êban