VOV4.Êđê- Sang êa drao kdiêk Čư̆ Sê, čar Gialai ngă leh bruă bi ktlah 3 čô hlăk jing F1 hlăm sa boh gŏ sang kyua bi tuôm hŏng sa čô mnuih ruă mâo kman klei ruă tưp covid 19 ti Bắc Giang. Ngă klei bi ktlah hŏng 3 čô anei dôk ti sang mrô 18, êpul anôk dôk mrô 9, êlan Cách Mạng, wăl Krah Čư̆ Sê, čar Gialai tuôm bi mtuôm leh hŏng mnuih hlăm sang pô ngă bruă ti knơ̆ng bruă HOSIDEN Quang Châu, ti Bắc Giang mâo kman sar Cov 2, tui si boh tŭ dưn klei mkă dlăng hrue 19/5. Leh wĭt truh kơ alŭ wăl jing kdriêk Čư̆ Sê 3 čô anei čŏng nao hưn kbiă hriê mơ̆ng krĭng mâo klei ruă tưp, lehanăn hưn mthâo kơ klei suaih pral pô, lehanăn truă čhiăm guôm ƀô̆ ti anôk lu mnuih, mâo phung knuă druh ktrâo atăt hdră bi ktlah ti sang gơ̆ pô. Ară anei jih jang ăt dôk mâo klei suaih pral, amâo mâo klei mtŭk, kăn mâo klei đĭ êngoh, kăn hnư̆ đah da, lehanăn hlăk dôk ksiêm dlăng./.

Pô mblang: Y-Khem Niê