VOV4.Êđê - Knơ̆ng bruă duh mkr amnia mblei Gialai hưn mơ̆ng akŏ thŭn truh kơ ară anei ênoh mâo bi mnia mblei hŏng ala tač êngao truh 360 êklăk dolar, djăp 59% hdră kčah hlăm thŭn, đĭ 22,3% mkă hŏng wưng anei thŭn dih. Hlăm anăn, kphê jing mnơ̆ng phŭn, truh 57,5% ênoh bi mnia mblei. Msĕ si, hlăm 7 mlan êgao, kphê Gialai mâo čhĭ kơ ala tač êngao truh 138 êbao tôn, jing knar hŏng 207 êklăk dolar.

Mkă hŏng wưng anei thŭn dih, čhĭ kphê kơ ala tač êngao đĭ truh 20%, kơ hnơ̆ng mâo lehanăn đĭ hĭn êbeh 24% kơ ênoh ênil. Knơ̆ng bruă duh mkra mnia mblei Gialai brei thâo, wưng leh êgao, phung mnia mblei kphê hŏng ala tač êngao hŏng klei pral mâo mkŏ mjing leh truh êbeh 34 êbâo ha đang kphê djăp ênoh čuăn 4C, UTZ, Organic, mâo hdră pla mjing djŏ guôp, mâo ênoh čuăn klă mngač wăt hŏng kdô kdŭng hruh đŭng, boh tŭ kphê, hưn klă mngač, phŭn agha, ktrâo klă anôk pla mjing, dưn yua jăk djăp hdră êlan kuôl kă kơ klei bi mnia mblei./.

Y Khem pô mblang