VOV4.Êđê- Hrue mbrue (29/11), čar Gialai kčưm tlŏ vaccine Covid 19 mơ̆ng knơ̆ng bruă Pfizer – BioNTech kơ hđeh hriăm hră mơ̆ng 12 thŭn truh kgŭ 17 thŭn. Msĕ si, hdră gĭt gai mơ̆ng Êpul kiă kriê bruă mdrơ̆ng hŏng klei ruă tưp Gialai, mâo hlăm brô 60 êbâo 200 čô hđeh mơ̆ng 16 truh kơ kgŭ 18 thŭn hlăm kluôm čar srăng dưi tlŏ mgang êlâo. Klei tlŏ mgang anei srăng ngă hlăm dŭm boh sang êa drao să, ƀuôn hgŭm dŭm anôk tlŏ mgang ti sang hră, alŭ ƀuôn ti dŭm krĭng taih kbưi.

Tui si tĭng, leh jih tlŏ mgang kơ gưl thŭn anei, čar Gialai srăng lŏ dơ̆ng tlŏ mgang kơ êbeh 113 êbâo 200 čô hđeh mơ̆ng 12 thŭn truh kgŭ 16 thŭn. Hŏng wang bi kpleh dua aruăt tlŏ mgang jing mơ̆ng 3 – 4 hrue kăm. Êpul kiă kriê bruă gang mkhư klei ruă tưp Gialai mtă leh kơ dŭm alŭ wăl ngă bruă tlŏ mgang kơ phung hđeh hŏng klei pral, kñăm čiăng mâo tlŏ ênŭm kơ hđeh gưl thŭn mơ̆ng 12 truh kgŭ 18 thŭn hlăm thŭn anei mtam./.

Pô mblang: Y-Ƀel Êban