VOV4.Êđê - Êpul kiă kriê bruă mdrơ̆ng hŏng klei ruă tưp Gialai hưn, hlăm mlan hrue 4/8, lŏ mâo truh 25 čô mnuih ruă Covid 19. Jing ênoh mâo jih jang hlăm hrue truh 38 čô mnuih. Anei jing ênoh mâo lu hĭn êdi mơ̆ng êlâo dih truh kơ ară anei. Hlăm ênoh 38 čô mnuih ruă anăn, lu jing mnuih wĭt mơ̆ng krĭng mâo klei ruă tưp, ba bi ktlah lehanăn mkă dlăng kman mtam leh wĭt truh hlăm čar. 3 čô jing F1 mơ̆ng mnuih ruă 36712; 1 čô jing pô đru mgăt êdeh prŏng, dŭ ba mnơ̆ng mơ̆ng ƀuôn prŏng Hồ Chí Minh – Đồng Nai nao kơ čar Kontum, weh ti ƀuôn prŏng Pleiku mơ̆ng hrue 30/7 truh kơ ară anei. Pô anei hmao ƀuh mâo klei ruă tưp leh čŏng nao mkă dlăng kman. Čar hlŏng tui duah lehanăn mkă dlăng kman kơ 10 čô F1. Snăn ka ƀuh kman ôh. Snăn, mơ̆ng hrue 26/4 truh aguah 5/8/2021, čar Gialai mâo leh jih jang truh 159 čô mnuih mâo kman Sar CoV2, hlăm anăn mâo 7 čô mnuih hlao leh kbiă mơ̆ng sang êa drao./.

Y Khem pô mblang