VOV4.Êđê - Aguah mbrue (22/7) Anôk bruă kiă kriê klei ruă čar CDC Gialai hưn, čar lŏ mâo 4 čô mnuih mâo klei ruă tưp covid 19 mrâo, mđĭ ênoh mnuih mâo klei ruă tưp hlăm gưl klei ruă tưp bluh đĭ anei 21 čô leh. Hlăm anăn mâo 3 čô jing F1 mơ̆ng dŭm mnuih ruă čar kontum, lehanăn kdriêk krông Pa, 1 čô mnuih ngă bruă mơ̆ng čar Bình Dương wĭt kơ Gialai, hlăk dôk bi ktlah ti kdriêk Phú Thiện.

Dŭm anôk djŏ tuôm hŏng mnuih ruă mrâo lu jing ti wăl krah Kbang, lehanăn ƀuôn prŏng Pleiku. Ară, knơ̆ng bruă sang čư̆ êa kdriêk Kbang, knơ̆ng bruă sang čư̆ êa ƀuôn prŏng Pleiku mâo leh hră mtrŭn brei lŏ mdei jih jang bruă mnia mblei amâo mâo tŭ dưn msĕ si karaoke, masage, mjuăt asei mlei lu mnuih, anôk hlăm game, dŭm klei bi lông. Dŭm anôk čhĭ mnơ̆ng ƀơ̆ng hua, anôk mnăm kphê bi hlue ngă djŏ hŏng mta mtrŭn kơ bruă mdrơ̆ng hŏng klei ruă tưp, đŭ bi kmhal hlei pô amâo mâo truă čhiăm guôm ƀô̆ hlăm anôk lu mnuih./.

Y Khem pô mblang