VOV4.Êđê - Dŭm boh sang hră gưl 3 ti čar Gia Lai mprăp leh djăp ênŭm klei găl mâo čiăng dơ̆ng mkŏ mjing Klei bi lông jih gưl 3 ala čar hŏng klei êđăp ênang, hlăk klei ruă Covid 19 dôk mâo dleh dưi ksiêm dlăng.

Ti sang hră gưl 3 Nguyễn Bỉnh Khiêm, wăl krah Čư̆ Sê, kdriêk Čư̆ Sê, čar Gialai, phung hđeh adŭ 12 hlăk lŏ dôk bi hdơr klei hriăm, lehanăn lông ngă dŭm akŏ klei bi lông. Phung nai mtô mơ̆ng sang hră gưl 3 Nguyễn Bỉnh Khiêm lŏ mjuăt kơ hđeh mâo ai tiê kjăp čiăng dưi ngă klei bi lông hŏng boh tŭ dưn kdlưn hĭn. Nai mtô Trần Thị Hồng Uyên, nai klam bruă bi hdơr klei hriăm Ngữ Văn, sang hră gưl 3 Nguyễn Bỉnh Khiêm brei thâo:“Hlăm klei hriăm mjuăt lehanăn mtô bi hriăm snăn phung nai lehanăn hđeh hriăm hră jih ai tiê hluê ngă ênoh čuăn 5 mta klei mtă, jih jang phung hđeh truă čhiăm guôm ƀô̆, rao kngan mdjiê kman. Êjai hlăm yan dôk găn klei ruă tưp msĕ si ară anei, hnơ̆ng tŭ dưn klei hriăm mjuăt ƀiă lu ăt hmăi amâo mâo jăk, kyuadah hmăi mơ̆ng klei ruă tưp mơ̆ng thŭn dih truh thŭn anei. Nai mtô, sang hră, mguôp hŏng dŭm êpul bruă nga leh jăk bruă lŏ bi hdơr klei hriăm, mđĭ ai phung amĭ ama hđeh, mtă mtăn kơ anak aneh pô nao bi ênŭm hlăm grăp mmông lŏ bi hdơr klei hriăm pioh bi lông”.

Klei bi lông thŭn anei, sang hră gưl 3 Nguyễn Bỉnh Khiêm, kdriêk Čư̆ Sê mâo mkăp leh truh 23 boh adŭ bi lông kơ êbeh 300 čô hđeh nao bi lông. Tui si nai Nguyễn Hải Hà – Khua sang hră gưl 3 Nguyễn Bỉnh Khiêm, leh knơ̆ng bruă sang hră mơar čar Gialai tĭng yap ênoh anăn, sang hră pral dăp mtam dŭm boh adŭ bi djŏ guôp. Mbĭt hŏng anăn, sang hră čŏng mprăp djăp êa pioh rao kman bi mdjiê kman, čhiăm guôm ƀô̆, masin mkă hnơ̆ng h’uh asei mlei... kñăm bi mâo klei êđăp ênang gang mkhư̆ klei ruă tưp hlăm dăl klei bi lông “Tơdah mâo phung hđeh jing F1; F2 snăn hưn mtam hŏng knơ̆ng bruă sang hră mơar. Knơ̆ng bruă mâo klei čoh čuăn jing bi hưn mthâo kơ klei suaih pral êlâo kơ bi lông 7 hrue čiăng păn kjăp klei phung hđeh, knuă druh dlăng klei bi lông hŏng bi tuôm. Khua knơ̆ng bruă sang hră mơar čar ăt jao, tơdah mâo mnuih tuôm bi mtuôm leh hŏng F0; F1 snăn sang hră anăn đua klam yơh, čiăng si srăng ngă klei bi lông dưi mâo klei tŭ dưn”.

Nai mtô Trần Văn Lượng, khua sang hră gưl 3 Tôn Đức Thắng, kdriêk Đức Cơ brei thâo, klei bi lông jih gưl 3 thŭn anei êngao kơ bruă hlue ngă kjăp bruă gang mkhư̆ klei ruă tưp, lehanăn lŏ bi hdơr klei hriăm kơ hđeh êlâo kơ bi lông, sang hră lŏ đru kơ grăp čô hđeh hriăm hră mâo klei hdĭp dleh dlan čiăng kơ phung hđeh bi leh jăk klei bi lông ti anăp:“Sang hră srăng ngă klei bi lông jih gưl 3 hlue dua hdră, tơdah klei ruă tưp dôk ti hnơ̆ng msĕ si ară anei, snăn sang hră srăng ngă klei bi hdơr klei hriăm ti sang hră mtam. Dŭm mta klei hriăm pioh kơ hđeh lŏ bi hdơr, mâo phung nai mkra hĕ bi kjăp mprăp leh êlâo. Bi tơdah tuôm hŏng klei ruă tưp dleh dưi ksiêm dlăng, snăn phung nai srăng bi lar klei hriăm pioh bi hdơr lehanăn mbha kơ grăp čô hđeh, leh  kơ anăn nai bi hriăm hŏng hdră online djŏ tui si knơ̆ng bruă sang hră mơar ktrâo atăt. Phung hđeh mnuih djuê ƀiă mơ̆ng sang hră jing lu mơh, prăk kăk bi liê dleh dlan, sang hră gĭt gai leh jih jang hră mơar mbha kơ hđeh bi hdơr sang hră srăng klam, hđeh amâo mâo bi liê prăk pô ôh”.

Klei bi lông jih gưl 3 kluôm čar Gialai mâo êbeh 14 êbâo čô hđeh ngă hră mơar bi lông hŏng 39 anôk bi lông klă klơ̆ng, lehanăn 17 anôk mkăp leh ti 17 boh kdriêk, wăl krah, ƀuôn prŏng hŏng 616 boh adŭ bi lông. Tui si tĭng srăng mâo 1282 čô knuă druh dlăng klei bi lông, 20 čô knuă druh kiă kriê, lehanăn giăm 500 čô mnuih đru ngă bruă hlăm klei răng mgang msĕ si kahan ksiêm, bruă mdrao mgŭn.

Nguyễn Văn Long, k’iăng khua knơ̆ng bruă sang hră mơar čar Gialai brei thâo, knơ̆ng bruă mkŏ mjing leh mơh hdră êlan bi lông jih gưl 3 hlăm 4 hnơ̆ng pioh mdrơ̆ng hŏng klei ruă tưp covid 19. Mơ̆ng ară anei truh kơ gưl bi lông, dŭm Êpul gơ̆ng klei bi lông gưl 3 hlăm čar Gialai mprăp sơăi hdră mdrơ̆ng hŏng jih jang klei amâo mâo jăk huĭdah mâo, čiăng kơ klei bi lông dưi mkŏ mjing hlăm klei êđăp ênang, mâo klei tŭ dưn jăk hĭn:“Knơ̆ng bruă sang hră mơar gĭt gai leh dŭm knơ̆ng bruă êpul êya ngă djăp bruă kơ klei bi lông êjai bi djŏ hŏng klei bhiăn, djŏ hdră, rơ̆ng kơ bruă mdrơ̆ng hŏng klei ruă tưp mơh, êjai klei ruă tưp hlăk hlê bluh đĭ. Hlăm jih jang 4 hdră mkŏ mjing klei bi lông bi mđrĭng hŏng 4 hnơ̆ng dôk găn mơ̆ng klei ruă tưp, hlue ngă bi ênŭm 5 mta klei mtă êlâo, hlăm, lehanăn êdei kơ klei bi lông. Knơ̆ng bruă mâo leh mơh hră mtrŭn mta kơ jih jang hđeh hriăm hră, phung nai nao hlăm klei bi lông, knuă druh dlăng klei bi lông ngă sơăi bruă hưn mthâo kơ klei suaih pral pô 7 hrue êlâo kơ klei bi lông, lehanăn ba jih klei leh hưn anăn kơ anôk mkŏ mjing klei bi lông pioh ksiêm dlăng mghaih msir”./.