VOV4.Êđê - Hruê anei 7-7, giăm 1 êklăk čô hđeh hlăm kluôm ala klă sĭt mŭt hlăm hruê tal êlâo klei bi lông hriăm jih gưl 3 thŭn 2021 gưl 1, hŏng 2 klei bi lông mâo Ngữ Văn leh anăn Toán. Aguah, 7h30 mnĭt phung bi lông srăng bi lông Ngữ văn, hluê hdră čih, mmông čih mkra 120 mnĭt. Tlam bi lông Toán. Êlâo anăn hlăm tlam mbruê, phung bi lông nao ti dŭm anôk bi lông čiăng ngă hră mơar bi lông, mkra anôk soh tơdah mâo, hmư̆ klei bhiăn bi lông, hruê mmông bi lông. Kyua klei ruă Covid-19 dleh ktuê dlăng anăn lu dŭm anôk bi lông mkŏ mjing klei hriăm mjuăt dŭm hdră gang mkhư̆ klei ruă tưp, mprăp djăp ênŭm êa drao, kdrăp gang mkhư̆ klei ruă msĕ si: Čhiăm guôm ƀô̆, êa drao rao kngan, êa rao leh anăn mƀlir dŭm hră čih kơ hdră gang mkhư̆ klei ruă tưp… Čiăng kơ klei bi lông mkŏ mjing jăk leh anăn êđăp ênang, K’iăng Khua phŭn bruă sang hră mtô bi hriăm Nguyễn Hữu Độ - Khua Anôk bruă gĭt gai gưl ala čar klei bi lông hriăm jih gưl 3 thŭn 2021 mtă: dŭm anôk bi lông brei mtă mtăn kơ phung knuă druh, phung dlăng klei bi lông, hđeh bi lông mâo bruă klam hĭn hlăm jih hruê bi lông kñăm rơ̆ng amâo mâo ôh klei soh năng mâo.

Hlăm 2 hruê 5 lehanăn 6/7, knơ̆ng bruă mdrao mgŭn čar Dak Lak ngă leh bruă ksiêm mkă kman Sars CoV 2 hmar kơ 150 čô jing phung nai dlăng hlăm klei bi lông, pô kiă klei bi lông, dŭm čô đru hlăm klei bi lông lehanăn ksiêm mkă kman hmar kơ 500 čô hđeh nao ngă klei bi lông bi ruê̆ klei hriăm gưl 3 hlăm sang hră gưl 3 Lăk, wăl krah Liên Sơn, kdriêk Lăk. Anei jing kdriêk mâo mnuih mâo klei ruă tưp Covid-19 djŏ tuôm hŏng anôk ruă jing ƀuôn prŏng Hồ Chí Minh lehanăn dôk bi ktlah, mdrao mgŭn. Truh kơ ară anei, jih jang mta mă ksiêm mkă kman anei amâo mâo ƀuh ôh kman. Khădah čiăng rơ̆ng mâo klei êđăp ênang hlăm mmông ngă klei bi lông, knơ̆ng bruă mdrao mgŭn čar Dak Lak jao leh kơ anôk bruă mdrao mgŭn kdriêk Lak hrăm mbĭt ngă dŭm bruă gang mkhư̆ klei ruă tưp Covid-19 hlăm hruê mmông ngă klei bi lông hlăm alŭ wăl.

H Zawut + Y Ƀel pô mblang