VOV4.Êđê- Aguah hruê 9/7, 580 êbâo hnơ̆ng vaccine Covid 19 mơ̆ng AstraZeneca hluê si klei kuôl kă blei mơ̆ng Hdră rlŏ mgang VNVC truh leh ti tač êdeh phiơr prŏng Tân Sơn Nhất.Hŏng 580.000 hnơ̆ng vaccinne mơ̆ng VNVC jing gưl ba jao tal 3 hlăm klei kuôl kă 30 êklăk hnơ̆ng mâo Anôk bruă mguôp hnư Vaccine Việt Nam (VNVC) blei mơ̆ng anôk bruă AstraZeneca, lehanăn ba jao hluê si klei kuôl kă kơ Phŭn bruă mdrao mgŭn.

Ênoh vaccine anei srăng ba jao kơ Phŭn bruă mdrao mgŭn kñăm pral pŏk hdră tlŏ mgang kơ mnuih ƀuôn sang, boh nik ti dŭm anôk dôk mâo klei ruă tưp. Êngao anăn, VNVC ăt ƀuăn srăng hrăm mbĭt hlăm bruă mkăp vaccine mơ̆ng anôk bruă AstraZeneca ba jao djŏ wưng kčah. Ăt hlăm aguah hruê 9/7, 400.000 hnơ̆ng vaccine mơ̆ng Nhật Bản đru truh leh ti tač êdeh phiơr Tân Sơn Nhất. Anei jing ênoh vaccine dôk hlăm ênoh 2 êklăk hnơ̆ng vaccine mâo Nhâtj Bản ƀuăn đru kơ Việt Nam./.

Pô mblang: H’Nêč Êñuôl