VOV4.Êđê- Mbĭt hŏng phung hđeh hlăm kluôm ala čar, hruê 7/7, êbeh 19.800 čô hđeh ti Dak Lak mŭt leh hlăm Klei bi lông gưl tlâo thŭn 2021 (gưl tal 1). Khădah jing sa hlăm dŭm alŭ wăl mâo mnuih ruă Covid 19 ƀiădah hŏng klei ksiêm dlăng kjăp klei ruă anei kyua anăn phung hđeh, phung amĭ ama lehanăn jih jang mnuih nao hgŭm bi đru hlăm klei bi lông anei h’ĭt ai tiê, đăo knang kơ klei bi lông dưi mkŏ mjing hŏng klei êđăp ênang, djŏ hdră bhiăn.

Ti anôk bi lông Sang hră gưl tlâo Lăk, wăl krah Liên Sơn, kdriêk Lăk, jing alŭ wăl mâo 2 čô ruă Covid 19, jih jang phung hđeh dưi ksiêm dlăng kman pral lehanăn boh tŭ amâo ƀuh ôh kman klei ruă mơ̆ng anăn phung hđeh h’ĭt ai tiê nao bi lông. Jih jang phung hđeh hluê ngă kjăp hdră gang mkhư̆ klei ruă, truă čhiăm guôm ƀô̆, rơ̆ng dôk bi kbưi, amâo bi kƀĭn lu mnuih sa blư̆, Êpul hgŭm mđĭ leh êpul nai aê mdrao truh 10 čô hluê ngă hdră ksiêm dlăng hnơ̆ng hlơr asei mlei, rao kngan hŏng êa rao bi mdjiê kman êlâo kơ mŭt adŭ bi lông. Mbĭt hŏng bruă mprăp djăp klei thâo, phung hđeh mâo leh klei thâo săng rơ̆ng kjăp klei suaih pral êlâo kơ mŭt hlăm klei bi lông./.

Pô mblang: H’Nêč Êñuôl