VOV4.Êđê - Khua phŭn bruă mdrao mgŭn Nguyễn Thanh Long mrâo hưn mthâo dŭm bruă djŏ tuôm kơ hdră gang mkhư̆, mdrơ̆ng hŏng klei ruă Covid 19, boh nik ti dua čar Bắc Giang, Bắc Ninh; mbĭt anăn mtă kơ dŭm gưl, dhar bruă, boh nik dŭm alŭ wăl, brei mđĭ klei răng, amâo dưi ngă ngơi, lŏ dơ̆ng iêu mtrŭt wăt anôk bruă kđi čar lehanăn mnuih ƀuôn sang nao hlăm hdră gang mkhư̆ klei ruă.

Hluê si Khua phŭn bruă Nguyễn Thanh Long, gưl bluh mâo klei ruă Covid 19 tal 4 hlăk dleh dưi ksiêm dlăng, năng ai srăng mâo sui hĭn mkă hŏng dŭm gưl bluh mâo êlâo; srăng mâo ti lu alŭ wăl hŏng lu phŭn bi mtưp, lu anôk bluh mâo klei ruă hlăm sa wưng, bluh mâo lu mta mrâo mơ̆ng kman anei hŏng hnơ̆ng tưp lar pral hĭn, ktang hĭn. Khua phŭn bruă Nguyễn Thanh Long mtă, hlăm wưng ti anăp, dŭm gưl, dhar bruă boh nik dŭm alŭ wăl brei mđĭ klei răng, amâo ngă ngơi, lŏ dơ̆ng iêu mtrŭt anôk bruă kđi čar lehanăn mnuih ƀuôn sang nao hgŭm hlăm hdră gang mkhư̆ klei ruă tưp./.

H Nêč pô mblang