VOV4.Êđê - Leh 9 hruê ngă bruă, Hà Nội bi leh bruă tlŏ mgang vaccine gang mkhư̆ Covid 19 kơ mnuih ƀuôn sang mơ̆ng 18 thŭn kơ dlông. Tơdah êlâo anăn, Hà Nội luič lu mlan čiăng dưi mâo 2,2 êklăk čô mnuih tlŏ vaccine gang mkhư̆ Covid 19 snăn hlăm gưl anei, Hà Nội tlŏ leh giăm 3 êklăk aruăt. Hŏng ênoh mnuih 5,75 êklăk čô mơ̆ng 18 thŭn kơ dlông, Hà Nội mâo leh êbeh 96% ênoh mnuih dưi tlŏ leh aruăt tal 1 vaccine gang mkhư̆ Covid 19. Ti jih jang anôk tlŏ, mâo mkŏ dăp jăk găl čiăng kơ mnuih ƀuôn sang nao tlŏ, rơ̆ng kjăp hdră kčah mtrŭn gang mkhư̆ klei ruă tưp msĕ si Êa rao mdjiê kman, ksiêm dlăng hnơ̆ng hlơr. Kñăm rơ̆ng mta kñăm mâo kčah mtrŭn hlăm hdră tlŏ mgang, ƀuôn prŏng Hà Nội mtă kơ dŭm alŭ wăl, anôk tlŏ mkŏ mjing hdră tlŏ 3 wưng (Aguah, tlam, mmăt)/hruê./.

H Nêč pô mblang