VOV4.Êđê - Khua bruă Đảng ƀuôn prŏng Hà Nội Đinh Tiến Dũng brei thâo, knơ̆ng bruă mdrao mgŭn ƀuôn prŏng phŭn rơ̆ng leh kơ 1.600 klei tlŏ mgang vaccine hŏng klei dưi tlŏ 500.000 aruăt vaccine hlăm sa hruê. Giăm 8.000 čô nai mdrao, aê mdrao, mnuih ngă bruă ksiêm mkă kman, mnuih mă bruă hŏng masin, phung hriăm mơ̆ng 12 čar; ƀuôn prŏng mâo tiŏ nao đru kơ ƀuôn prŏng phŭn.

Kyua mâo ai dưi anei, dŭm anôk tlŏ mgang ngă leh bruă jih hnơ̆ng. dŭm anôk tlŏ mgang mâo sơăi phung êa mdrao, nai mdrao kăp dŏng mdrao rơ̆ng klei êđăp ênang kơ mnuih ƀuôn sang. Hŏng klei ngă bruă anei, truh hruê anei, ƀuôn prŏng Hà Nội dưi ngă leh 100% bruă tlŏ mgang kơ mnuih mơ̆ng 18 thŭn kơ dlông ƀiă êdi sa aruăt vaccine. Khua bruă Đảng ƀuôn prŏng Hà Nội Đinh Tiến Dũng mtă kơ dŭm gưl bruă, dhar bruă lŏ bi mguôp hŏng knơ̆ng bruă mdrao mgŭn, dŭm êpul ngă bruă hlăm čar, ƀuôn prŏng, dưn yua grăp mnĭt mmông ngă bi leh bruă tlŏ mgang mâo hnơ̆ng jăk lehanăn boh tŭ dưn.

Y Ƀel pô mblang