VOV4.Êđê – Aguah anei 12/6, êbeh 93.000 hđeh sang hră ti Hà Nội nao hgŭm hlăm klei bi lông mŭt adŭ 10 sang hră gưl tlâo knŭk kna wưng2021-2022 hŏng 2 mta bi lông jing Ngư̆ Văn lehanăn klei ala tač êngao. Aguah mgi (13/6), phung hđeh san hră lŏ dơ̆ng bi lông 2 mta hriăm dôk jing Toán lehanăn klei hriăm ƀuê ênuk. Čiăng rơ̆ng mâo klei êđăp ênang lehanăn dôk bi kbưi gang mkhư̆ klei ruă tưp êjai phung hđeh nao hlăm klei bi lông. K’iăng khua kiă kriê bruă sang čư̆ êa ƀuôn prŏng Hà Nội Chử Xuân Dũng, Khua gĭt gai bruă bi lông ti ƀuôn prŏng Hà Nội wưng thŭn 2021-2022 mtă kơ dŭm anôk bi lông dăp dŭm čô knuă druh dlăng klei bi lông srăng hriê hnưm hĭn čiăng drông phung hđeh sang hră, lehanăn mtă kơ 184 anôk ngă klei bi lông leh ruê̆ klei bi lông srăng ngă klei bi mdoh, mdjiê kmam jih jang adŭ bi lông, sang hră. Čiăng rơ̆ng dưi mâo klei bi lông jăk, djŏ hdră bhiăn, knơ̆ng bruă mtô mjuăt lehanăn sang hră mơar Hà Nội tiŏ nao leh 500 čô knuă druh nao ksiêm dlăng ti 184 anôk ngă klei bi lông lehanăn mkŏ mjing dŭm êpul ksiêm dlăng nao ti dŭm anôk bi lông lehanăn ksiêm dlăng klei bruă ngă klei bi lông.

H Zawut pô mblang