VOV4.Êđê- Knơ̆ng bruă ksiêm hriăm kơ klei ruă tưp Gưl dlông mrâo bi klă leh ênoh mbha 100 êbâo hnơ̆ng vaccine AstraZeneca kơ dŭm êpul êya bruă hlăm ƀuôn prŏng Hà Nội. Ênoh vaccine anei mơ̆ng knŭk kna Hungary đru, dưi mkra mjing ti ala čar Italia. Knơ̆ng bruă ksiêm hriăm kơ klei ruă tưp gưl dlông brei thâo, hlăm 100 êbâo hnơ̆ng vaccine anei, Sang êa drao hnak Gưl dlông mâo mbha truh 10 êbâo hnơ̆ng, sang êa drao Bạch Mai 8 êbâo hnơ̆ng, sang êa drao hđeh Gưl dlông, Sang êa drao E, sang êa drao Hữu Nghị grăp boh sang êa drao 6 êbâo hnơ̆ng, sang hră gưl prŏng bruă mdrao mgŭn Hà Nội 5 êbâo hnơ̆ng. Anôk bruă ksiêm hriăm kơ klei ruă tưp gưl dlông tŭ mă giăm 51 êbâo hnơ̆ng pioh mkăp kơ dŭm alŭ wăl. Tui si klei bi mklă hlăm bruă mbha êa drao anei, Anôk bruă ksiêm hriăm kơ klei ruă tưp Gưl dlông mtă kơ dŭm êpul êya mkŏ mjing mtam klei tlŏ mgang ênoh vaccin leh mâo mbha anăn kơ phung ƀuôn sang hlăm ƀuôn prŏng Hà Nội, kñăm čiăng dưi ba yua vaccine anăn hŏng klei tŭ dưn, djŏ mta kñăm, djŏ mnuih./.

Pô mblang: Y-Ƀel Êban