VOV4.Êđê - Aguah hruê 4/8, K’iăng khua knŭk kna Vũ Đức Đam, Khua anôk bruă ala čar gĭt gai hdră gang mkhư̆ klei ruă Covid 19 mrâo mă bruă hŏng Knơ̆ng gĭt gai hdră gang mkhư̆ klei ruă ƀuôn prŏng Hà Nội. Blŭ hrăm gĭt gai klei bi kƀĭn, K’iăng khua knŭk kna Vũ Đức Đam mñă klă, Hà Nội jing alŭ wăl huĭ srăng bluh mâo lu mnuih ruă. Hlăm wưng êgao, jih anôk bruă kđi čar lehanăn mnuih ƀuôn sang Hà Nội mâo leh lu klei gĭr ktưn kñăm gang mkhư̆, ksiêm dlăng kjăp klei ruă tưp. Ƀuôn prŏng Hà Nội mâo leh klei bi mklă djŏ, mâo hdră mrâo hlăm bruă hluê ngă hdră mdrơ̆ng, gang mkhư̆ klei ruă tưp. K’iăng khua knŭk kna brei thâo, anôk bruă ala čar gĭt gai hdră gang mkhư̆ klei ruă Covid 19 lehanăn Hà Nội brei mâo hdră bi hgŭm kjăp. Hluê hŏng klei hlak mblang mơ̆ng Êpul bruă hâo hưn kơ klei ruă tưp, anôk bruă gĭt gai, klă klơ̆ng jing K’iăng khua knŭk kna Vũ Đức Đam bi trông leh hŏng phung khua kiă kriê ƀuôn prŏng Hà Nội, hưn mthâo hŏng Khua knŭk kna čiăng hrăm mbĭt pŏk ngă Asăp mtrŭn mrô 16/CT-TTg mơ̆ng Khua knŭk kna./.

H Nêc pô mblang