VOV4.Êđê- Hlăm dua hrue 30, lehanăn 31/8 hđeh hriăm hră adŭ 1 ti čar Daknông kčưm klei nao sang hră mơar thŭn hriăm 2021 – 2022 hlue hdră dôk bi kbưi, kñăm dưi mdrơ̆ng hŏng klei ruă tưp. Dưi drông hđeh hriăm hră mơ̆ng ƀăng jang sang hră, bi mdoh kman kiê kngan, lehanăn ksiêm dlăng hnơ̆ng h’uh asei mlei êlâo kơ mŭt hlăm adŭ. Jih jang phung amĭ ama hđeh, hđeh hriăm hră, knuă druh, nai mtô ngă bi kjăp 5 mta klei mtă. Thŭn hriăm 2021 – 2022, kluôm car Daknông mâo êbeh 182 êbâo čô hđeh hriăm hră hlăm djăp gưl.

Hlăm anăn mâo 38 êbâo čô hđeh mŭt hriăm adŭ hđeh điêt, êbeh 72 êbâo čô hđeh gưl sa, 48 êbâo čô hđeh gưl 2, giăm 23 êbâo čô hđeh hriăm gưl 3, lehanăn hlămbrô 1 êbâo čô hđeh hriăm ti sang hră mjuăt bi hriăm nanao. Leh êpul adŭ 1, mơ̆ng hrue anei (1/9), phung hđeh hriăm hră djăp gưl mkăn ti Daknông srăng nao sang hră hlue hŏng klei dôk bi kbưi. Hjăn êpul hđeh adŭ điêt amâo mâo nao kơ sang hră ôh, knŏng srăng drông hđeh êdei kơ hrue 5/9./.

Pô mblang: Y-Khem Niê