VOV4.Êđê - Ƀuh kơ knhuah gru dhar kreh klei dliê đưm Jrai ƀrư̆ hruê ƀrư̆ luč, 2 čô hđeh sang hră Hà Kpăh H’Huyền lehanăn Hồ Thị Hồng Nhung (sang hră gưl 3 Plei me, kdiêk čư̆ Prông, čar Gia Lai) hrăm mbĭt ngă hdră “ksiêm dlăng boh tŭ dưn bruă rơ̆ng poih klei dliê đưm Jrai hŏng klei dliê mâo rup kơ hđeh sang hră gưl sa”. Ti klei bi lông klei mrâo mrang gưl čar phung hđeh sang hră gưl 2 tal VII (thŭn hriăm 2020-2021), hră êlan anei mâo klei pah mni kdlưn hĭn.

Ti krah mlan 3 mđiă ktang, H’Huyền lehanăn Nhung ăt gĭr nao hiu mdah dŭm pŏk hdruôm hră klei dliê đưm Jrai kơ dŭm čô hđeh sang hră mnuih Jrai ti să Ia Ga, kdriêk čư̆ Prông, čar Gia lai.

Bi dah boh phŭn čuăn ruah akŏ anei, H’Huyền brei thâo “djuê ana Jrai jing djuê ana mâo hƀuê ênuk êlâo hĭn ti čar Gia Lai lehanăn mâo lu klei yuôm bhăn hlăm knuah gru dhar kreh, khădah mbĭt hŏng klei bi kma lehanăn đĭ kyar, dŭm knhuah gru dhar kreh anei ƀrư̆ hruê ƀrư̆ luč. Ti kdrêč mkăn, jih jang klei yăl dliê kơ dhar kreh mơ̆ng mnuih Jrai mâo lu êdi ƀiădah ka dưi ba yua jih ôh, jing sa čô anak mơ̆ng mnuih Jrai, ñu čiăng đru mguôp ai tiê pô hlăm bruă kriê poih, răng mgang lehanăn bi lar klei yuôm bhăn mơ̆ng knhuah gru dhar kreh djuê ana đưm anei.

Adei Hồ Thị Hồng Nhung brei thâo: Ară anei, ti sang hră gưl 1 ka mâo klei mtô kơ dŭm mta knhuah gru dhar kreh hlăm alŭ wăl, kyuanăn hmei čiăng ba knhuah gru dhar kreh đưm Jrai truh hlăm sang hră gưl 1, čiăng đru mguôp kriê poih dhar kreh alŭ wăl, leh anăn bi djŏ klei čiăng srăng mlih hdră mtô ti sang hră.

Mâo klei mtô mơ̆ng nai Hoàng Việt Trung – khua bruă đoàn hlăm sang hră, H’Huyền lehanăn Hồ Thị Hồng Nhung ngă bruă anei hŏng klei gĭr jih ai tiê. H’Huyên brei thâo: čiăng lač kơ klei thâo ƀuh mơ̆ng hđeh sang hră mnuih Jrai, hmei mkra leh klei ksiêm êmuh hŏng hră kơ 300 čô hđeh sang hră ti alŭ wăl. Boh tŭ dưn dưi ƀuh bruă bi lar klei dliê đưm Jrai jing ƀiă êdi. Mâo knŏng 10,7% hđeh sang hră thơ̆ng hmư̆ klei dliê đưm Jrai mơ̆ng aduôn aê leh anăn mnuih prŏng, dŭm phung dôk sui sa blư̆ amâodah tuôm hmư̆ dŭm klei dliê đưm anei. Klei anei ngă kơ phung hđeh amâo thâo săng ôh boh tŭ dưn, klei yuôm bhăn mơ̆ng dŭm klei yăl dliê đưm Jrai, lehanăn bruă kriê poih klei yăl dliê đưm anei jih ƀiă êdi.

Tui hluê klei ksiêm êmuh leh anăn dŭm klei jing hlăm alŭ wăl anăn, 2 čô hđeh sang hră anei mĭn mtam kơ hdră êlan čiăng rơ̆ng poih klei dliê đưm anei hŏng hdră hdruôm hră klei dliê mâo rup. Êngao kơ 6 klei dliê đưm hlăm druôm hră phŭn mơ̆ng Romah Del, Hồng Nhung lehanăn H’Huyền lŏ tui duah thiăm 4 klei yăl dliê đưm. Dŭm klei yăl dliê đưm anei diñu mkra, leh anăn kač rup bi hmô hŏng klei jăk dlăng, djŏ kơ phung hđeh sang hră gưl 1. Hdruôm hră klei yăl dliê đưm mơ̆ng diñu mâo 53 pŏk hla mơar lehanăn mâo 3 kdrêč: Klei yăl dliê dưm kơ hlô mnơ̆ng, klei yăl dliê đưm kơ klei hdĭp, klei yăl dliê đưm mâo mbĭt klei myang.

Leh kơ bi leh hdruôm hră klei yăl dliê đưm hŏng rup anei. H’Huyền leh anăn Hồng Nhung nao hiu ksiêm êmuh, lehanăn mâo nai kiă kriê hlăm adŭ hriăm diñu đru mkŏ mjing klei hriăm lông ba yua hlăm dŭm mmông mtô klei hriăm  kơ hđeh sang hră adŭ 3,4,5. Dưi mâo boh tŭ dưn jăk kyua ƀuh hđeh sang hră khăp kơ klei dliê lehanăn rup hlăm hdruôm hră anei, Lehanăn ƀuăn rơ̆ng srăng hiu hưn hŏng dŭm čô ƀĭng găp mkăn lehanăn mnuih hlăm sang, diñu lŏ kuôl kă srăng lŏ tui duah lu klei yăl dliê đưm mkăn čiăng lŏ rơ̆ng pioh knuah gru dhar kreh anei.

Nai Hoàng Việt Trung, Khua bruă đoàn ti sang hră gưl 3 Plei Me, kdriêk čư̆ Prông, čar Gai lai brei thâo: hlăm 6 mlan ngă bruă, nai leh anăn hđeh sang hră mâo leh klei mĭn leh anăn mă akŏ kơ klei ksiêm duah, leh mkra mjing hdruôm hră leh anăn hiu ksiêm êmuh.. H’Huyền lehanăn Hồ thị Hồng Nhung dưi duah ƀuh êbeh 30 klei yăl dliê đưm mơ̆ng mnuih Jrai. Khădah ti klei bi lông klei ksiêm duah leh êgao nai lehanăn hđeh sang hră ba knŏng 10 klei yăl dliê đưm djŏ hŏng klei čiăng leh anăn thŭn phung hđeh sang hră. Leh mâo klei dưi kdlưn hĭn nai hŏng hđeh kdjăt lehanăn hơ̆k mơak snăk. Dưi thâo dŭm klei bi hriăm hlăm alŭ wăl lŏ srăng mâo thiăm klei mtô mơ̆ng alŭ wăl pô. Hmăng hmưi hdruôm hră klei yăl dliê đưm mâo rup mơ̆ng 2 čô hđeh sang hră anei dưi jing sa hlăm dŭm klei mtô hriăm hlăm dŭm sang hră gưl 1 ti alŭ wăl.