VOV4.Êđê - Kñăm mkă tĭng dŭm klei jăk găl, dleh dlan, bi trông kơ dŭm hdră msir mghaih, ba yua klei găl mâo čiăng krơ̆ng kjăp hnơ̆ng đĭ kyar anôk bruă rông hdang hlăm boh klei mrâo, aguah hruê 16/7, ti Hà Nội, Phŭn bruă Lŏ hma mđĭ kyar krĭng ƀuôn sang mkŏ mjing leh Klei bi kƀĭn online kơ “Hdră msir mđĭ kyar anôk bruă hdang thŭn 2021 lehaanăn Pŏk ngă Klei bi mklă mơ̆ng Khua knŭk kna kơ bruă bi mklă Hdră êlan mđĭ kyar bruă rông mnơ̆ng hlăm êa mơ̆ng Việt Nam truh ti thŭn 2030, hnơ̆ng tă hdră truh ti thŭn 2045”. Hlăm 6 mlan akŏ thŭn anei, hnơ̆ng mâo hdang đăo tĭng truh 371 êbâo ton, đĭ 12% mkă hŏng wưng anei thŭn 2020. Mbĭt hŏng dŭm boh tŭ dưi mâo lehanăn klei bi mklă kơ anôk bruă rông hdang mơ̆ng Việt Nam brei ƀuh, srăng lŏ tlă anăp hŏng klei dleh dlan hlăk klei ruă Covid 19 dôk mâo dleh dưi ksiêm dlăng lehanăn klei dleh hlăm wăl anôk bi ktưn mnia mblei. Pŏk ngă Hdră êlan mđĭ kyar bruă rông mnơ̆ng hlăm êa mơ̆ng Việt Nam truh ti thŭn 2030, hnơ̆ng tă hdră truh ti thŭn 2045 mâo leh Khua knŭk kna bi mklă srăng mđing truh kơ mta kñăm mđĭ kyar mnơ̆ng hlăm êa mâo boh tŭ mơ̆ng 3 – 4% hlăm thŭn; hnơ̆ng mâo truh 9,8 êklăk ton, ênoh prăk bi mnia mblei hŏng tač êngao mâo mơ̆ng 14 truh kơ 16 êklai đôlar lehanăn msir mghaih bruă mă kơ êbeh 3,5 êklăk čô mnuih ngă bruă./.

H Nêč pô mblang