VOV4.Êđê - Ƀri gưl bi hdơr 110 thŭn Hruê Awa Hồ duah êlan mtlaih ala čar 5-6, mmăt mbruê 4/6 ti Hà Nội, Hră klei mrâo điện tử Đảng Cộng sản Việt Nam mkŏ mjing Hdră kdŏ mmuiñ “Awa Hồ jing klei đaŏ knang mâo klei tŭ dưi”. Hlăm jih klei kdŏ mmuiñ jing klei yăl dliê kơ Awa - sa čô khua gĭt gai prŏng, jih klei hdĭp săn asei kyua klei êngiê mơ̆ng djuê ana, sa ai tiê kyua lăn čar, kyua mnuih ƀuôn sang. Nu jing leh klei bi hmô jĕ giăm, sĭă suôr, mngač leh anăn jăk siam, dŭm klei bi hmô knhuah hdĭp jăk hŏng dŭm gưl ênuk mnuih Việt Nam.

Hdră dưi mkŏ mjing hŏng klei kdŏ mmuiñ jăk siam mbha 2 kdrêč: kdrêč tal 1: Ñu duah rup ala čar, kdrêč tal 2: Hồ Chí Minh- mtrang mngač klei mĭn Việt Nam. Nao hlăm hdră jing phung mmuiñ hing ang msĕ si: NSƯT Đăng Dương, NSƯT Thanh Lam, NSƯT Hoàng Tùng, Anh Thơ, Lê Anh Dũng ... bi êdah klei mmuiñ jăk siam kơ Đảng, kơ Awa Hồ khăp hơiêng msĕ si: Ñu jing klei đaŏ knang tŭ dưi, gru jơ̆ng phă anăp, hlâo klĭt juă Awa Hồ, Âwa Hồ sa klei khăp êbeh dlai… 

H Zawut pô mblang