Bi hdơr 78 thŭn hruê phung kahan êka êkeh - êngiă asei aguah 24/7, ti Hà Nội, Phŭn bruă kriê dlăng bruă knuă bi hgŭm hŏng Phŭn bruă lĭng kahan. Phŭn bruă kahan ksiêm, Knơ̆ng bruă sang čư̆ êa ƀuôn prŏng Hà Nội leh anăn dŭm anôk bruă djŏ tuôm mkŏ mjing klei bi tuôm hŏng 250 čô bi ala kơ phung mâo ai hŏng lăn čar kluôm ala. Phung bi ala jing phung knuă druh krŭ kdơ̆ng, knuă druh tuôm nao bi blah lŏ bi hdơr kơ knhuah gru krŭ kdrưh kơăm mơ̆ng djuê ana, kah mbha kơ klei bi mlih hlăm ênuk đĭ kyar.

Blŭ hrăm hlăm anôk bi tuôm, Khua gĭt gai Đảng Tô Lâm bi êdah ai tiê hdơr knga êlam snăk kơ giăm 1,2 êklăk čô êngiă asei - phung jhŏng ktang săn leh asei kyua čar kwar. Ñu bi mklă Đảng, Knŭk kna mđing kơ bruă hdơr knga tla ai leh anăn mtă kơ dŭm phŭn, dhar bruă, alŭ wăl lŏ dơ̆ng ksiêm dlăng, bi leh, ngă jăk hdră êlan đru kơ phung mâo ai hŏng lăn čar, đru lar bra klei bhiăn “Mnăm êa hdơr kơ hnoh” hlăm kluôm ala ƀuôn.