Hlăm grăp wưng knhal jih hrue kăm, thâodah hrue knăm, 21 čô đảng viên mơ̆ng kđông kahan răng mgang knông lăn Axan mâo jao đru ba kơ 95 gŏ sang ti 2 să A Xan lehanăn Tr’hy, kdriêk Tây Giang (čar Quảng Nam) lŏ bi nao čuă êmuh mđĭ ai phung ƀuôn sang ti knông lăn. Păn kjăp klei mĭn, ai tiê, lehanăn lŏ tui duah knhuah hdĭp klei mưng mơ̆ng phung ƀuôn sang hlăm krĭng anei, kahan răng mgang knông lăn kđông Axan mâo ngă leh lu hdră, đru kơ phung ƀuôn sang, dŭm gŏ sang dleh dlan, kpưn đĭ tlaih kơ ƀun.

Gŏ sang Bliềng, ti ƀuôn Ki’noonh, să Axan, êlâo dih lĕ hlăm klei dleh dlan, ƀun ƀin. Ƀiădah mơ̆ng leh mâo phung đảng viên kđông kahan knông lăn Axan đru, ktrâo brei hdră duah ƀơ̆ng snăn klei hdĭp gŏ sang Bliềng mâo leh klei bi mlih êdi.

“Êlâo dih gŏ sang kâo knap mñai snăk, klei hdĭp kplŭt hguah kƀah tlam, mâo kahan răng mgang knông đru brei leh kơ mjeh ŭn rông, ktrâo atăt hdră rông, snăn ară anei ŭn đĭ lar lu, mâo ba wĭt klei tŭ dưn kơ klei hdĭp. Lač jăo kơ phung lĭng kahan lu snăk”.

        Mâo klei đru mơ̆ng phung đảng viên kđông răng knông lăn Axan mâo mđĭ ai phung ƀuôn sang gĭr hgao klei dleh dlan duh ƀơ̆ng. Thượng uý Nguyễn Văn Trọng, Khua êpul đru čung ba phung ƀuôn sang, mơ̆ng kđông kahan răng mgang knông lăn A xan brei thâo, kđông jao leh bruă kơ grăp čô đảng viên nao đru ƀiă êdi mơ̆ng 5 - 7 gŏ sang ƀun, gŏ sang hdĭp hjăn, klei hdĭp dleh dlan. Hjăn ñu đru ba truh kơ 5 gŏ sang.

“Kbiă hriê mơ̆ng klei hdĭp mda mơ̆ng mnuih ƀuôn sang hlăm alŭ wăl kđông kahan knông lăn dôk, snăn ƀuh dôk hlăm klei dleh dlan. Kđông mâo leh lu hdră êlan đru kơ phung ƀuôn sang mđĭ kyar klei hdĭp mda. Leh mâo kahan răng mgang knông lăn nâo đru čuang ba ktăt hdră duh ƀơ̆ng. Jing dŭm hdră êlan duh ƀơ̆ng mrâo snăn mâo leh lu gŏ sang dơ̆ng mdul leh, boh mnga ba wĭt dơ̆ng đĭ leh hlăm alŭ wăl”.

       Ngă klei tiŏ nao phung đảng viên hlăm kahan răng mgang knông lăn đru kơ phung ƀuôn sang ti knông lăn, kđông kahan răng mgang knông lăn Axan tiŏ nao tal êlâo hĭn jing phung lĭng kahan mâo leh klei mưng hlăm bruă anei, thâo hlăm bruă kăp kčĕ đru, đru kơ phung ƀuôn sang mđĭ kyar klei hdĭp mda, msir klei ư̆ êpa bi hrŏ klei ƀun knap. Thiếu Tá Nguyễn Văn Lợi, Khua bruă Đảng, Pô ngă bruă kđi čar kđông Axan, kdriêk Tây Giang, čar Quảng Nam brei thâo: Mơ̆ng leh mâo hdră êlan tiŏ nao phung đảng viên đru ba phung ƀuôn sang, snăn klei hdĭp mda phung ƀuôn sang mâo leh klei bi mlih klă mngač, mâo leh lu gŏ sang kpưn đĭ kơ mdrŏng:

“Kđông tiŏ nao phung đảng viên đru čung ba phung ƀuôn sang dôk hlăm klei hdĭp dleh dlan ti alŭ wăl. Kñăm kăp kčĕ hŏng dŭm gŏ sang anăn hlăm klei duh ƀơ̆ng, lehanăn kăp mđing tơdah ya mta klei jing dleh dlan, wĭt hưn hŏng dŭm gưl kăp lŏ đru kơ phung ƀuôn sang. Mơ̆ng klei đru phung ƀuôn sang hlăm hdră duh ƀơ̆ng, kahan răng mgang knông lăn dôk ngă ară anei, mơ̆ng anăn klei hdĭp mda phung ƀuôn sang hlăm krĭng mâo leh klei bi mlih. Ară anei lu leh gŏ sang dơ̆ng mâo klei bi mlih klei hdĭp pô”.

        Đại tá Nguyễn Bá Hưng, K’iăng pô ngă bruă kđi čar kđông kahan răng mgang knông lăn čar Quảng Nam brei thâo, Anôk bruă Đảng, Knơ̆ng kiă kriê kahan răng mgang knông lăn čar mâo leh klei gĭt hai truh 11 boh kđông bi hgŭm hŏng bruă Đảng, knơ̆ng bruă sang čư̆ êa 30 boh să ti knông lăn, plao ksĭ tiŏ nao leh truh 212 čô đảng viên nao đru kơ êbeh 1.000 gŏ sang. Hlăm anăn, mâo 132 đảng viên đru klam bruă čung ba mnuih djuê ƀiă truh 720 gŏ sang. Lu đảng viên mâo lu hdră mă bruă jăk, kjăp, thâo mkŏ mjing, mâo mta kñăm yuôm bhăn dưi đru leh dŭm gŏ sang pô čung ba. Đại tá Nguyễn Bá Hưng lač, tal êlâo phung đảng viên mâo mtrŭt mjhar leh lu gŏ sang mkŏ mjing gŏ sang dhar kreh, amâo mâo klei ngă soh hŏng hdră bhiăn knŭk kna, amâo mâo klei ngă soh hŏng yang ƀuôn, tă brei êlan kơ phung ƀuôn sang hdĭp ti knông lăn mă bruă duah ƀơ̆ng tŭ jing:

“Đảng viên mmao jao bruă đru dŭm gŏ sang, grăp mlan mkŏ mjing hdră mă bruă đru mđĭ kyar bruă duh ƀơ̆ng, đru bi hgŭm răng mgang klei êđăp ênang ƀuôn sang. Hŏng dŭm hdră mâo ngă jăk snăk dưi đru leh êbeh 10 gŏ sang mâo klei bi mguôp dleh thâo tĭng knăl, čung digơ̆ amâo mâo ngă soh hŏng klei bhiăn ôh. Êngao anăn, lŏ đru truh 25 gŏ sang tlaih mơ̆ng klei dleh dlan, ngă bruă jăk hlăm klei răng mgang knông lăn, mđĭ kyar klei hdĭp mda ala ƀuôn jăk hlăm alŭ wăl”./.