Hdră mtrŭn klei kbĭn kluôm tal 13 mơ̆ng Đảng bi klă leh: mđĭ kyar hrăm mbĭt leh anăn mkŏ mjing klei bi mguôp plah wah dŭm alŭ wăl, dŭm krĭng. Mbĭt anăn, tă êlan kơ klei đĭ kyar dŭm krĭng hluê êlan ba yua jăk hĭn leh anăn bi lar jih hnơ̆ng dŭm klei găl mơ̆ng grăp krĭng kơ bruă mkŏ mkra, klei găl čŏng mâo, bruă duh mkra – bruă kđi čar, ai dưi mă bruă leh anăn mđĭ hĭn knhuah bi mguôp krĭng leh anăn mlir krĭng, čiăng bi mguôp hlăm boh kơ jih jang bruă, mkŏ mjing wăl đĭ kyar mrâo. Ya srăng ngă čiăng dưi mâo mta kñăm anei? Klei čih Čiăng kñăm iêo jak klei duh bi liê kơ bruă mkŏ mkra čiăng bi lar jih hnơ̆ng klei găl krĭng.

 Čiăng mâo klei bi hgŭm krĭng snăn klei găl tal sa jing brei mâo anôk bruă nah gŭ leh anăn mkŏ bruă nah gŭ. Hlue si Trần Văn Hảo -  Khua Knơ̆ng bruă tuh tia mkra mjing čar Hải Dương, hlăm dŭm anôk bruă nah gŭ klă klơ̆ng, čiăng êdi snăn klei găn êrô găl ênưih plah wah dŭm alŭ wăl jing tur knơ̆ng mkŏ krĭng leh anăn mlir krĭng ăt msĕ mơh mjing dŭm anôk bruă nah gŭ yuôm bhăn mkăn:

Mtă kơ dŭm Phŭn, dhar bruă gưl dlông, Knơ̆ng bruă sang čư̆ êa dŭm čar, ƀuôn prŏng hnưm kƀĭn mđĭ pral mkŏ mjing dŭm hdră bruă êlan klông mkŏ hrăm mbĭt plah wah dŭm čar, ƀuôn prŏng hlăm krĭng kñăm mđĭ klei bi hgŭm krĭng, mđĭ mkŏ mjing mđĭ kyar dŭm anôk bruă tuh tia mkra mjing, dŭm wăl bi hgŭm bruă leh anăn wăl tuh tia mkra mjing, mnia blei, mđing bi liê mkŏ mjing mrâo amâodah pŏk mlar dŭm anôk bruă Logictics hnơ̆ng prŏng ti Hải Phòng, Quảng Ninh, Hà Nội, Hải Dương leh anăn dŭm čar mâo klei găl čiăng mkŏ mjing dŭm anôk bruă Logictics kñăm mđĭ kyar leh anăn mđĭ lar klei dưi bi blŭ hrăm, bi đru, boh tŭ bi hrŏ prăk bi liê kơ dŭm anôk bruă duh mkra mđĭ klei dưi bi ktưn mjing boh kdrŭt kơ klei mđĭ kyar kluôm krĭng…

Boh sĭt mơ̆ng krĭng dap mnai krông Hồng - alŭ wăl yuôm bhăn kơ kđi čar, bruă duh mkra, dhar kreh, ala ƀuôn, lĭng kahan, klei êđăp ênang leh anăn bruă hŏng tač êngao mơ̆ng lăn čar. Hŏng mta phŭn jing ƀuôn prŏng phŭn Hà Nội - jing 1 hlăm 2 anôk phŭn kơ bruă duh mkram boh kdrŭt mđĭ kyar mrô sa mơ̆ng kluôm ala, hlăm wưng êgao, kyua mâo klei bi hgŭm, mjĕ êrô bruă duh mkra, dŭm alŭ wăl hlăm krĭng dap mnai krông Hồng mâo leh klei đĭ kyar kơ bruă êlan klông, logistics… Wăt tơdah snăn, hlue si Lê Việt Nga -  K’iăng Khua dlăng anôk ba čhĭ hlăm ala čar, Phŭn bruă tuh tia mnia blei ăt mâo lu bruă mơ̆ng bruă sang čư̆ êa dŭm alŭ wăl hlăm krĭng brei bi hgŭm mbĭt hlăm klei pŏk ngă mrâo dưi bi mlih hdră bruă mnia blei hlăm krĭng leh anăn kluôm ala:

Mâo dŭm bruă drei ƀuh jing klei bi hgŭm krĭng snăn ăt ka dưi ba yua jih ôh. Si tô hmô hŏng hdră kčah kơ anôk bruă Logistics snăn krĭng dap mnai krông Hồng dưi mđing dlăng leh Khua knŭk kna bi mklă hlăm Hdră mtrŭn mrô 1012 thŭn 2015 kơ krĭng dap mnai krông Hồng mâo sa anôk bruă Logistic mrô sa ti krĭng Dưr Hà Nội, anôk bruă Logistic mrô 2 ti Dhŭng Hà Nội, leh anăn truh thŭn 2030 lŏ mâo wăt dŭm anôk bruă Logistic mâo ênhă truh 50 ha dưi mkŏ hŏng dŭm kdrŭn ksĭ - mơ̆ng bruă êdeh phiơr truh kơ kdrŭn ksĭ hlăm krĭng wăl, ƀiădah truh ară anei drei ăt ka mâo. Snăn bruă iêô jak duh bi liê hlăm bruă anei brei mâo klei hrăm mbĭt bi hgŭm mơ̆ng dŭm alŭ wăl.

  Sa klei mĭn snei mơh, ƀiădah Trần Thị Phương Lan - Pô mâo klei dưi Khua Knơ̆ng bruă tuh tia mnia blei ƀuôn prŏng Hà Nội mñă klă bruă klam mơ̆ng Phŭn bruă tuh tia mnia blei hlăm bruă mđĭ kyar anôk bruă logistics mkŏ krĭng leh anăn mlir krĭng:

Hlue si kâo mĭn snăn lu čar hlăm krĭng mâo klei găl mđĭ kyar logistics hlăm bruă êlan dơ̆ng, êlan phiơr, êlan êa ksĭ, êa krông… anăn kâo čiăng snăk hlăm bruă anei Phŭn bruă tuh tia mnia blei srăng ngă bruă klam phŭn čiăng tă hdră, atăt kơ dŭm čar, leh anăn drei ktrâo klă kơ dŭm anôk čiăng mđĭ kyar đăm mktŭk mtŭl, leh anăn mâo klei tŭ dưn, ba yua jih klei găl dŭm ktuê êlan drei mâo klei găl hlăm krĭng…

 Bruă mđĭ klei bi hgŭm plah wah dŭm alŭ wăl hlăm krĭng čiăng mkŏ mjing dŭm anôk bruă duh gŭ msĕ si êlan klông, dŭ mdiăng, logistics, bruă mnia blei… srăng mjing klei găl kơ klei dŭ mdiăng, găn êrô, mbha mnơ̆ng dhơ̆ng. Triệu Đăng Khoa -  Khua Êpul hgŭm bruă Trạm bạc Đồng Xâm (hlăm ƀuôn bruă Trạm bạc Đồng Xâm, kdriêk Kiến Xương, čar Thái Bình) lač:

 “Tơdah mjing klei bi hgŭm snăn găl ênưih kơ mnơ̆ng dhơ̆ng mơ̆ng ƀuôn bruă Trạm bạc Đồng Xâm kyua grăp čô mnuih thâo sơăi, leh anăn jih jang dŭm bruă mnia blei lar ƀar snăn mnơ̆ng dhơ̆ng Trạm bạc Đồng Xâm klă sĭt srăng dưi lar ƀar hĭn…”

  Hlue si phung thơ̆ng kơ bruă duh mkra, K’iăng nai prŏng nai prĭn Trần Đình Thiên, leh mâo dŭm anôk bruă nah gŭ bi mkŏ, čiăng mâo klei bi hgŭm klă sĭt snăn brei mâo klei bi hgŭm mơ̆ng dŭm anôk bruă duh mkra ti dŭm alŭ wăl hlăm krĭng leh anăn mlir krĭng:

 “Klei tal êlâo leh mkŏ krĭng jing truh kơ bruă mkŏ mjing sa hdră mkra mjing, si bĕ ngă čiăng kơ dŭm anôk bruă, dŭm čar dưi bi hgŭm. Bruă tal êlâo jing hnơ̆ng trah dlăng hlăm klei čuăl mkă hŏng krĭng jing brei mjing dŭm wăl mđĭ kyar bruă, leh anăn snăn kơh dưi bi hgŭm. Bruă duh mkra iêô jak dŭm anôk bruă bi liê hlăm anăn jing brei bi hgŭm. Tal dua njing kơ klei bhiăn, snăn dŭm klei bi mklă sui hŏng anei drei lač mâo krĭng snăn anăn jing krĭng lăn, amâo djŏ jing krĭng čiăng bi hgŭm mđĭ kyar ôh, jing klei bhiăn drei ka mâo.  Brei mâo dŭm hdră bi hgŭm krĭng snăn kơh rơ̆ng kơ dŭm hdră anăn mkŏ krĭng čiăng amâo bi kpăk… amâo djŏ ôh msĕ si ară anei plah wah 2 čar đa đa knŏng kbưi hŏng sa boh ƀrĭk ƀiădah ăt kăn dưi bi hgŭm rei…”

      Klă sĭt, klei yuôm bhăn hĭn jing mkŏ mjing, bi leh klei bhiăn leh anăn amâo mdei mkra mđĭ wăl hdĭp mda mơ̆ng grăp alŭ wăl truh kơ dŭm krĭng leh anăn mlir krĭng, mơ̆ng anăn kơh mjing klei găl čiăng iêô jak mđĭ kyar anôk bruă nah gŭ krĭng mrâo mrang, hnơ̆ng prŏng leh anăn klei găl msĕ si klei blŭ mguôp mơ̆ng Nguyễn Thị Bích Ngọc - K’iăng Khua phŭn bruă hdră kčah leh anăn duh bi liê:

Knŭk kna grăp thŭn ăt mâo leh Hdră mtrŭn mơ̆ng Knŭk kna kơ klei mkra mlih wăl duh bi liê mnia blei. Kyua anăn, hmei ăt mtă kơ dŭm alŭ wăl hlăm krĭng kƀĭn pŏk ngă tŭ dưn dŭm hdră mtrŭn anei čiăng mkra mlih hră mơar, mjing djăp klei găl čiăng iêô jak duh bi liê hlăm bruă mđĭ kyar nah gŭ. Dŭm alŭ wăl hlăm krĭng brei pral bi hgŭm, mkŏ mjing klei mđĭ kyar bi liê hlue si krĭng leh anăn mkŏ mjing, mtrŭn hdră bruă iêô jak bi liê hlue hdră PPP wưng 2021-2030 mâo wăt klei bhiăn, hdră êlan mdul čiăng iêô jak duh bi liê êngao knŭk kna, mơ̆ng anăn đru kơ anôk bruă duh mkra thâo săng hĭn leh anăn mjing klei đăo knang tơdah hgŭm bi liê mđĭ kyar anôk bruă nah gŭ…