Klei bhiăn Lăn ala (mkra mlih) bi mbŏ dŭm mta klei čuăn kơ bruă ksiêm dlăng, yua lăn dôk, lăn lŏ hma bi mguôp kơ klei mnia mblei, lăn mkăp kơ bruă hiu čhưn ênguê mâo mta klei đăo knang, bruă mkŏ mkra ti wăl dlông, ti gŭ lăn, lăn mâo mơ̆ng êa ksĭ, klei čuăn kơ bruă kriê dlăng lăn lĭng kahan bi mguôp hŏng bruă duh mkra kñăm bi lar ai dưi, klei găl lăn ala…

Trần Quý Bình – Khua kiă kriê êpul hgŭm bruă Hữu Nghị, čar Hà Giang hưn mdah, klei čuăn kơ hdră čuăl mkă lăn bruă lŏ hma hŏng dŭm kdriêk krĭng Čư̆ Chiăng, krĭng taih kbưi ăt dôk hluê êlan mkŏ mjing klei găl kơ mnuih ƀuôn sang mlih bruă yua lăn djŏ guôp hŏng klei bhiăn, klei mưng yua lăn mơ̆ng mnuih ƀuôn sang jing mnuih djuê ƀiă kñăm ba yua tu dưn dŭm ai dưi mơ̆ng lăn. Trần Quý Bình hlăk mbang:

Mâo lu ênhă lăn lŏ hma ƀiădah amâo mâo dưi pla mjing ƀiădah mâo leh klei čuăl mkă lăn lŏ hma leh, kyuanăn amâo mâo brei arăng mlih mta kñăm yua lăn, anăn yơh truh klei luč liê mang, lui êruh lăn lu êdi, boh nik jing ti dŭm kdriêk čư̆ čhiăng anei mâo lu ênhă lăn amâo mâo dưi pla mjing ƀiădah tăp čuăl mkă jing lăn lŏ, kyuanăn amâo lŏ dưi mkra mlih ôh truh kơ klei luč liê leh anăn amâo mâo dưi mlih jing lăn ngă bruă lŏ hma mkăn, kyuanăn hră mơar ñu dleh êdi, srăng mâo klei bi klă mơ̆ng Êpul gơ̆ng bruă ƀuôn sang, găn lu klei bi klă leh anăn êmưt, kyuanăn hmăi truh kơ phung yua lăn mâo lăn čiăng mlih kơ mta bruă lŏ hma mkăn.

Hdră mkăp klei bhiăn lăn ala (mkra mlih) ăt bi mbŏ dŭm klei čuăn kơ hruê mmông yua lăn leh anăn hdră kčah yua lăn lŏ hma dưi bi klă hlăm Kdrêč 7, klei čuăn yua dŭm mta lăn. Phung čiăng mlih yua lăn lŏ hma dưi pŏk phai brei klei dưi mkŏ mjing bruă duh mkra, gŏ sang, grăp čô amâo mâo klă anăp mkra mjing bruă lŏ hma (mta 213). Bi mbŏ klei čuăn kơ hdră bi kƀĭn, mkin lăn ala kơ bruă mkra mjing bruă lŏ hma, hdră bi mguôp klei dưi yua lăn, mkra mlih klei dưi yua lăn hŏng dŭm hdră kñăm kơ bruă lŏ hma, hdră êlan mtrŭt mjhar dŭm êpul êya, gŏ sang, grăp čô hluê ngă klei mklin lăn čiăng mkra mjing bruă lŏ hma.

Hoàng Trọng Thuỷ - Sa čô thơ̆ng kơ bruă lŏ hma lač, dŭm klei mkra mlih anei tơdah dưi bi klă leh anăn hluê ngă kluôm ênŭm srăng đru mkŏ mjing boh kdrŭt ktang kơ klei đĭ kyar bruă lŏ hma:

Êjai drei pŏk phai mmông yua lăn, klei ba yua lăn ala hŏng ƀĭng ngă lŏ hma leh anăn hŏng bruă lŏ hma srăng dưi mđĭ hĭn, leh anăn boh kdrŭt prŏng hĭn jing dưi pŏk phai ênhă lăn msĕ sơnăn brei klei dưi mkra mlih klei bhiăn lăn ala čiăng pŏk phai mmông yua lăn. Lăn ala lĕ hlăm knăm phung thâo ngă bruă lŏ hma amâodah phung mâo ngăn prăk, amâodah phung mâo hdră mnêč, phung dưi mkŏ hŏng lu gŏ sang ƀĭng ngă lŏ hma čiăng mkra mjing sa mta mnơ̆ng dhơ̆ng mâo hnơ̆ng tŭ jăk, boh kdrŭt čiăng mkra mjing prŏng hĭn, hnơ̆ng tŭ jăk boh mnga bruă lŏ hma srăng đĭ hĭn.

Hdră mkăp klei bhiăn lăn ala mkra mlih dưi bi klă mâo lu mta mrâo mâo knhuah kdlưn hĭn, mâo boh tŭ dưn hlăm bruă bi kƀĭn, bi mklin lăn ala čiăng mđing truh kơ klei đĭ kyar bruă lŏ hma hnơ̆ng prŏng leh anăn mrâo mrang. Bi kơ hdră kčah ba yua lăn lŏ hma mơ̆ng gŏ sang, grăp čô, mta 170 klei bhiăn yua lăn (mkra mlih) bi klă hnơ̆ng ba jao klei dưi yua lăn bruă lŏ hma mơ̆ng grăp čô hŏng grăp mta lăn. Hŏng klei čuăn anei, ênhă lăn pla mjing ana kyâo grăp thŭn mơ̆ng grăp gŏ sang, grăp čô ba yua lu êdi truh kơ 45ha. Ênhă pla mjing ana sui thŭn krĭng dap mnai jing 150ha. Krĭng dap, čư̆ čhiăng jing 450ha, ênhă lăn dliê knŭk kna mkuôm jing 450ha.

K’iăng khua nai prŏng – nai Prĭn Trần Đình Thiên sa čô thơ̆ng kơ bruă duh mkra bi klă, dŭm klei mlih mơ̆ng hdră mkăp srăng đru iêo jak klei nao hgŭm mơ̆ng knơ̆ng bruă duh bi liê kơ bruă lŏ hma, mơ̆ng anăn mkŏ mjing ai dưi lăn ala dưi bi lar boh tŭ dưn leh anăn kjăp hĭn:

Tal êlâo srăng mâo dŭm knơ̆ng bruă nao hgŭm leh anăn bruă anei ară anei mâo knơ̆ng bruă klă anăp ngă bruă lŏ hma jing knŏng ƀiă, boh nik hlăm bruă anei, knơ̆ng bruă nao hgŭm jing knơ̆ng bruă điêt, kyuanăn bruă tal êlâo jing si srăng ngă čiăng kơ diñu hriê kơ prŏng jing kmeh gơ̆ng kơ bruă anei leh anăn čiăng kơ knơ̆ng bruă đĭ kyar, drei srăng mâo sa tur knơ̆ng yuôm bhăn, anăn jing hdră êlan yua lăn srăng mâo klei mlih, tơdah amâo mâo, ƀĭng ngă lŏ hma srăng tŭ klei amâo mâo jăk, ai dưi amâo mâo bi lar boh tŭ dưn.

Dŭm klei čuăn mrâo kơ bruă kriê dlăng leh anăn yua lăn lŏ hma, hdră mkăp klei bhiăn lăn ala (mkra mlih) srăng đru mkra mlih lăn ala hŏng hdră anôk mnia mblei, bi djăp ênŭm hnơ̆ng čoh čuăn mơ̆ng dŭm mta bruă duh mkra, mtrŭt mđĭ klei bi kƀĭn, bi mklin lăn ala hŏng hdră mkra mjing bruă lŏ hma hnơ̆ng prŏng, kñăm leh anăn kjăp.