Mă hnư mnơ̆ng mâo ênoh 1 êklăk prăk leh anăn hră blei mnơ̆ng 0 prăk mơ̆ng Êpul hgŭm mnuih mă bruă čar Dak Lak mđup brei, ayŏng Y-Krik Êban, să Ea Tul, kdriêk Čư̆ Mgar jing mnuih mă bruă hlăm Êpul mă bruă Anôk bruă êa doh leh anăn bi doh wăl hdĭp mda krĭng ƀuôn sang čar Dak Lak yăl dliê, leh dua thŭn hmăi klei ruă Covid-19, ñu hŏng lu phung mă brư dleh dlan hlăm klei hdĭp. Hnư mnơ̆ng anei yuôm bhăn snăk, đru gŏ sang ñu drông Tết Qúy Mão trei mđao, jăk mơak. “Amâo djŏ hjăn kâo ôh ƀiădah jih jang mnuih mă bruă dleh dlan sơăi, mâo mnuih snăn luč bruă mă, đa mâo mnuih snăn myun msĕ si kâo mâo Knơ̆ng knơ̆ng bruă ngă hră mơar kuôl kă sui thŭn. Gŏ sang dleh dlan snăk, leh mâo hnư mnơ̆ng anei jing mơak snăk hlăm Tết Thŭn anei”

Hŏng adei Y Hổ H’Mok ti ƀuôn Kŏ Mlei, să Hòa Thắng, ƀuôn prŏng Ƀuôn Ama Thuôt, êdeh wai jơ̆ng mơ̆ng Êpul hgŭm gru bi kal hrah ƀuôn prŏng Ƀuôn Ama Thuôt iêô mkrum phung mâo ai tiê kmah mđup brei hlăm gưl Tết aneu jing hnư mnơ̆ng yuôm bhăn snăk. Êdeh wai jơ̆ng anei đru ñu thŭn mrâo amâo lŏ guôn kgŭ ưm čiăng êbat nao sang hră ôh leh anăn Tết anei Y Hổ srăng mdiăng adei ñu đĭ êdeh wai jơ̆ng mrâo anei hlăp hŏng phung găp hlăm ƀuôn: “Êlâo dih amâo mâo ôh êdeh wai jơ̆ng kâo nao sang hră dleh dlan snăk, leh mâo êdeh wai jơ̆ng kâo mơa snăk, kâo gĭr hriăm hră čiăng bi mơak kơ lu mnuih”

Hlăm boh sang mrâo rŭ mdơ̆ng prŏng siam, ayŏng Trịnh Thế Hậu, ti ƀuôn hgŭm Thiện An, să Ƀuôn Hô brei thâo, ñu mâo 23 thŭn mă bruă mtô bi hriăm , dŭm thŭn êgao kyua klei hdĭp dleh dlan, ñu pô lŏ mâo klei ruă ttiê nao mdrao liê lu prăk mah anăn amâo mâo klei găl mkra sang hjăn ôh ƀiădah dôk hŏng amĭ ama. Thŭn 2021 ayŏng Hậu dôk mă leh anăn mâo anak, boh sang mbĭt jing kniă leh anăn amâo jăk găl ôh. Ƀuh klei hdĭp dleh dlan ayŏng Hậu, mlan 10 thŭn 2022 êpul mă bruă sang hră Dak Lak đru kơ ayŏng Hậu 50 êklăk prăk čiăng rŭ mkra sang công đoàn. Hlăm gưl Tết boh sang bi leh leh anăn dưi ba yua: “Mkă hŏng dŭm thŭn êlâo snăn thŭn anei gŏ sang hmei mâo boh sang mrâo snăn mơak snăk, ăt hơĭt ai tiê mă bruă. Drông Têt hlăm klei mơak mbĭt mơ̆ng ung mô̆ jing mâo anak điêt leh anăn mâo sang mrâo, bruă mă kjăp mơh leh anăn mâo klei mđing dlăng mơ̆ng phung mă bruă knŭk kna snăn hmei bi mni lač jăk kơ jih jang phung mă bruă mbĭt đru leh hmei”

Hlue si Nguyễn Quang Thuân, K’iăng Khua Knơ̆ng bruă mnuih mă bruă leh anăn kahan êka êkeh ala ƀuôn čar Dak Lak, gưl Tết Nguyên đán Quý Mão 2023, Knơ̆ng bruă sang čư̆ êa čar Dak Lak pioh 76 êklai prăk čiăng mđup brei mnơ̆ng kơ phung, êpul êdah êdi. Dŭm pluh hnư mnơ̆ng đru kơ gŏ êsei ƀun, giăm ƀun leh anăn, mnuih mă bruă mâo klei hdĭp dleh dlan ăt dưi mâo dŭm êpul bruă, anôk bruă duh mkra leh anăn phung mâo ai tiê kmah nao mđup brei kơ mnuih ƀuôn sang hlăm gưl anei: “Thŭn anei čar gĭt gai kơ dŭm kdriêk, wăl krah, ƀuôn prŏng, dŭm să, ƀuôn hgŭm, wăl krah srăng nao mkŏ mjing bruă ngă mđup brei mnơ̆ng kơ phung ƀun ti čar, bi čar snăn mkŏ mjing 8 êpul mă bruă čiăng nao čhưn hŏng phung knŭk kna dlăng ba leh anăn nao čhưn hŏng phung gak răng hruê Tết. Êngao kơ ênoh prăk mơ̆ng čar đru snăn čar ăt gĭt gai kơ Êpul hgŭm gru bi kal hrah, mặt trận leh anăn dŭm êpul hgŭm mkăn gĭr mtrŭt mjhar dŭm anôk bruă duh mkra, phung ti čar čiăng kriê dlăng kơ mnuih ƀun amâo mâo hlei pô lui ti tluôn.

Dŭm hnư mnơ̆ng yuôm bhăn dưi mđup brei kơ phung mâo klei hdĭp dleh dlan hlăm gưl Tết đru kơ digơ̆ mâo thiăm ai tiê mơak, mjing thiăm klei mđĭ ai kơ digơ̆ gĭr ktưn hlăm klei hdĭp hŏng klei čang hmăng thŭn mrâo mâo lu klei mơak mrâo./.