Thŭn 2022, keh prăk đru kơ phung hđeh čar Dak Lak dưi iêo mkrum leh êbeh 8 êklai prăk, đru kơ êbeh 9.000 gưl čô hđeh. Dŭm mta bruă đru mâo: bruă kriê dlăng klei suiah pral leh anăn mta jăk kơ phung hđeh msĕ si ksiêm mkă hrŏng leh anăn mbraih klei ruă kboh čŏng mâo mơ̆ng tian amĭ, mkă dlăng dŭm mta klei ruă hlăm ală leh anăn brei êa drao amâo mâo mă prăk.

Bruă đru klei mtô mjuăt bi hriăm msĕ si rŭ mdơ̆ng adŭ hriăm leh anăn mđup brei kdrăp hriăm hră mơar, hlăp lêñ kơ phung hđeh krĭng taih kbưi, mđup brei klei đru hriăm hră mơar kơ phung hđeh sang hră mâo klei hdĭp dleh dlan thâo hriăm hră, mđup brei êdeh wai jơ̆ng leh anăn mnơ̆ng yua hriăm hră mơar kơ phung hđeh sang hră. Bruă răng mgang phung hđeh msĕ si: đru kơ phung hđeh tuôm hŏng klei amâo mâo jăk, mngăt êa, tŭ klei arăng čiăm biêng, mâo klei ruă duam, êrĭt êrin amĭ ama, đru kơ phung hđeh mâo amĭ ama djiê kyua klei ruă tưp Covid-19 leh anăn rŭ mdơ̆ng sang klei khăp kơ phung hđeh mâo klei hdĭp dleh dlan, hđeh êrĭt êrin…Wưng anei, Khua gĭt gai čar Dak Lak mñă kơ dŭm gưl bruă, dhar bruă, lŏ dơ̆ng uêñ mĭn, hrăm mbĭt hŏng keh prăk đru kơ phung hđeh čar čiăng mkŏ, hưn mdah hŏng dŭm hdră, phung đru dŏng, dŭm êpul êya êngao knŭk kna kñăm mđĭ hĭn klei đru kơ phung hđeh.