Lu klei blŭ bi mguôp kơ bruă jao lăn, brei mưn lăn, mlih mta knăm yua lăn, hrui mă, tla hnô, đru anôk dôk mrâo êjai knŭk kna hrui wĭt lăn mâo leh phung bi ala bi êdah.

Hluê si phung bi ala, hlăm boh sĭt, bruă hrui wĭt lăn mâo lu klei dleh dlan kpăk gun, ngă truh mâo lu klei kčŭt hưn, lu mnuih, lu jing kyua ka bi klă hdră êlan čiu tla, ka mâo klei hrăm mbĭt hlăm klei ngă bruă. Kyuanăn, hdră ngă bruă, hră mơar tla hnô, đru mkŏ mjing anôk dôk mrâo, hrui wĭt lăn čiăng mâo klei êngiê, klă mngač, klă sĭt leh anăn mâo bruă klam hlăk mblang, rơ̆ng bi kna boh tŭ knŭk kna, knơ̆ng bruă leh anăn mnuih ƀuôn sang. Brei klei blŭ kơ bruă mđĭ kyar lăn lŏ hma, lăn dliê hŏng klei brei mưn leh anăn ba jao, phung bi ala yap anei jing mta phŭn mrâo mkŏ mjing klei găl hlăm bruă mđĭ hnơ̆ng prŏng, ênhă lăn mkra mjing. Ƀiădah klei bhiăn čiăng bi klă hĭn kơ phung dưi mưn leh anăn jao lăn. Hlăm klei kƀĭn trông, phung bi ala kñăm brei klei blŭ kơ bruă mkŏ mjing klei čuăl mkă, hdră êlan yua lăn, dŭm klei čuăn djŏ tuôm hŏng bruă mđĭ kyar lăn, klei bi klă lăn yua, hră yua lăn leh anăn dŭm mta hră mơar knŭk kna, klei čih pioh kơ lăn.