Hŏng dŭm klei hâo hưn boh sĭt, klei bi kƀĭn đru kơ phung amai adei mâo thiăm klei thâo leh anăn hdră msir djŏ guôp čiăng jhŏng mphŭn čô̆ kơ bruă, mnia blei, ba yua dŭm tur knơ̆ng kdrăp mrâo kñăm mđĭ hnơ̆ng jăk mnơ̆ng dhơ̆ng, mkŏ mjing anăn knăl, klei dưi bi ktưn. Ăt hlăm gưl anei, Êpul hgŭm phung mniê Việt Nam mkŏ mjing klei bi lông klei mĭn mphŭn čô̆ kơ bruă, mnia blei thŭn 2023. Klei bi lông iêô jak 84 hră mơar bi lông mơ̆ng phung mniê hlăm čar. Dŭm hdră bruă bi lông hlăm dŭm hdră bruă, lu hĭn hlăm bruă lŏ hma hŏng dŭm mta mnơ̆ng dhơ̆ng jăk ti alŭ wăl msĕ si kphê, ca cao, pơ̆k mñam, knă kpiê čeh. Hlăm anăn, “Mnơ̆ng dhơ̆ng tŭ jăk mơ̆ng asăr kniê” êdah êdi mâo klei pah mni mtô sa. Tô Thị Tâm, Khua Êpul hgŭm phung mniê čar Dak Lak, Khua nôk bruă mkŏ mjing brei thâo:

         “Ênoh phung bi lông thŭn anei lu snăk leh anăn hdră bruă mprăp leh jăk, hưn mdah klă mngač, ba yua mnơ̆ng dhơ̆ng jăk ti alŭ wăl čiăng mđĭ lar leh anăn jing mnơ̆ng dhơ̆ng jăk. Phung brei klei pah mni ăt mơĭt leh kơ phung bi lông lŏ dơ̆ng hriăm mbŏ thiăm kơ hdră bruă pô čiăng dưi ba yua leh anăn êlam hĭn, boh nik mđing kơ bruă marketing leh anăn hnơ̆ng jăk mnơ̆ng dhơ̆ng, kdô mnơ̆ng dhơ̆ng čiăng hưn mdah truh kơ mnơ̆ng dhơ̆ng pô.

Ƀuh phung mniê mphŭn čô̆ kơ bruă, mnia blei dôk hlăm hdră mlih mrô mbĭt mơ̆ng lăn čar, hlăm dŭm thŭn êgao, Êpul hgŭm phung mniê Việt Nam mâo leh lu hdră, bruă ngă čiăng kơ phung mniê mphŭn čô̆ kơ bruă ba yua hdră mrô. Êngao kơ dŭm adŭ bi hriăm čiăng kơ phung mniê mưng hŏng klei thâo čiăng êdi, Êpul hgŭm lŏ đru kơ dŭm anôk bruă mnia blei điện tử, mkŏ bruă mnia blei, mơ̆ng anăn phung amai adei hriăm mnia blei, hưn mthâo mnơ̆ng dhơ̆ng hlăm anôk mnia blei điện tử. Nguyễn Thị Minh Hương, K’iăng Khua Êpul hgŭm phung mniê Việt Nam brei thâo:

“Klei ƀuh klă hĭn jing ti dŭm alŭ wăl, tơdah dŭm knăm mơak, hruê mphŭn čô̆ kơ bruă, snăn mâo nanao klei bi hgŭm plah wah dŭm phŭn, dhar bruă leh anăn Êpul hgŭm phung mniê Việt Nam čiăng đru kơ amai adei hgŭm hlăm hdră anăn.

Hlăm wưng kơ anăp Êpul hgŭm srăng lŏ dơ̆ng đru kơ phung mniê mphŭn čô̆ kơ bruă, mnia blei hlăm bruă ba yua kdrăp mrô, đru mđĭ kyar bruă lŏ hma mtah leh anăn doh čiăng djŏ guôp hŏng klei găl mđĭ kyar mtah leh anăn kjăp ară anei”./.