Lăn dap kngư mâo ênhă lăn êbeh 54.000 km2, truh 16,8% ênhă lăn hlăm kluôm ala. Ênoh mnuih ară anei knŏng êbeh   5,8 êklăk čô mnuih, hlăm anăn mâo giăm mkrah jing mnuih djuê ƀiă. Wưng leh êgao, Đảng lehanăn knŭk kna mâo leh klei mđing, gĭt gai ngă lu hdră mtrŭn, mâo hdră mă bruă čiăng đru klei kơ sang dôk, lăn dôk, lăn pla mjing jao lăn phăn dliê kơ krĭng mnuih djuê ƀiă, lehanăn đru kơ dŭm hdră êlan mđĭ kyar bruă duh ƀơ̆ng hlăm krĭng lăn dap kngư.

  Khădah snăn, truh kơ ară anei, ti Lăn Dap kngư ăt dôk mâo lu klei dleh dlan kơ lăn ala ka dưi mghaih msir hŏng klei sĭt êmĭt ôh, ênưih truh kơ klei bi mmiă, klei bi rai dliê ngă pưk hma, klei mă mnơ̆ng hlăm gŭ lăn soh hŏng klei bhiăn, klei uă druôm kyâo mtâo soh hŏng klei bhiăn... Msĕ si klei kiă kriê djă yua lăn jing anôk lăn pla mjing lehanăn lăn dliê, blŭ hrăm ti anôk trông čhai, Lương Thanh Bình- K’iăng khua knơ̆ng bruă ngăn dŏ – wăl hdĭp mda čar Gia Lai brei thâo, klei bi mmiă lăn dliê plah wah dŭm gŏ êsei tŭ mă phăn jao, lehanăn dŭm gŏ êsei mâo jao lăn, bruă čuăl krĭng lăn pla mjing, sang dôk kơ mnuih ƀuôn sang hlăm lăn pla mjing, đang dliê knŭk kna kiă kriê, lăn dliê hrông lăn pla mjing sui thŭn leh mơ̆ng mnuih ƀuôn sang pluă mbĭt tinăn, dleh thâo bi ksiêk, lu alŭ wăl mâo jao leh lăn, ƀiădah boh sĭt jing anôk lăn ka mâo klei mkă tĭng ôh, mơ̆ng anăn leh mâo hdră êlan bi jao lăn, păn dliê ngă truh kơ klei lăn hlŏng lui êruh, dliê kyâo mtâo jih duah bi druôm, lehanăn mnuih ƀuôn sang bi ksĭng mmiă, pla mjing mnơ̆ng anei mnơ̆ng dih...

 Lương Thanh Bình brei thâo, klei anei ngă truh kơ bruă lŏ hma, bruă dliê kmrơ̆ng mâo jao hlăm lăn ênhă prŏng, amâo mâo bi tlă prăk mưn yua lăn, lehanăn kăn mâo prăk duh bi liê, klei thâo mkŏ mjing bruă knuă dôk kƀah. Ƀiădah hlăm anăn mâo dŭm êpul êya bruă čiăng mkra mjing mđĭ kyar bruă knuă gŭ êyui dliê snăn lŏ gun hŏng klei bhiăn kơ klei bi ktưn mđĭ ênoh mưn djă yua lăn dliê hrông.     Lương Thanh Bình akâo leh kơ dŭm mta bruă djŏ tuôm hŏng klei čih mkra klei bhiăn lăn ala lŏ mlih mrâo:

“Tui si kâo, ară anei, bi mâo mta mtrŭn djŏ thâo bi mguôp hlăm klei čuăl mkă, kơ bruă kiă kriê, bruă răng mgang dliê, boh nik hŏng dliê hrông, bi mguôp hlăm anăn mđĭ kyar ana êa drao, kñăm thâo ba yua lăn hŏng klei tŭ jing, mđĭ ênoh mâo ba wĭt mơ̆ng dliê kmrơ̆ng. Bi hŏng mnuih djuê ƀiă, kâo ƀuh, mđĭ ênoh tŭ yap klei dưi djă yua lăn, hŏng lăn pla mjing mnơ̆ng hlăm grăp thŭn, lu lăn anôk jing sah kba pla mjing êtak êbai ktơr hbei amâo lŏ jing ôh. Bi tơdah ênoh čuăn knŏng hŏng 2ha, hŏng ênhă lăn anăn lŏ dơ̆ng mưn yua tla prăk mơh, sĭt nik phung ƀuôn sang amâo mâo čiăng nao ngă hră lăn ôh”.

 Mbĭt hŏng klei blŭ mơ̆ng čar Gia Lai, klei bi trông čhai mâo tŭ mă leh 11 klei blŭ mdê mdê mơ̆ng phung bi ala čar Kon Tum, Daklak, Dak Nông, Lâm Đồng lehanăn mơ̆ng phung kreh knhâo, phung bi ala bruă kƀĭn ala... adôk mâo lu snăk bruă ka dưi mghaih msir ôh klei kơ lăn ala, msĕ si klei kơ lăn dôk, lăn pla mjing, lăn dliê yang ƀuôn, klei djă yua lăn 5% mơ̆ng alŭ wăl anôk dôk, mjing anôk duah ƀơ̆ng hlăm gŭ êyui dliê... năng lŏ dơ̆ng ksiêm dlăng, lehanăn bi mlih.

Klah čŭn klei trông čhai Quàng Văn Hương- K'iăng khua Êpul Gơ̆ng bruă djuê ana hlăm bruă kƀĭn ala - ksiêm wĭt jih jang klei blŭ mơ̆ng phung bi ala. Kyuadah boh sĭt klei dleh dlan dôk găn, klei dôk gun kpăk ti dŭm alŭ wăl jing djăp mta klei năng brei mâo klei bi mlih mtam, kñăm ciăng ênưih kơ bruă ruh mgaih, boh nik bi mâo dŭm mta mtrŭn lŏ thiăm djŏ tuôm hŏng klei hdĭp mnuih djuê ƀiă, msĕ si: Mta 17 kơ bruă klam mơ̆ng knŭk kna klei kơ lăn ala hŏng mnuih djuê ƀiă, mâo leh đa đa pruĕ êlan hlăm dŭm mta 52, mta 175, mta 178, mta 179, mta 180. Quàng Văn Hương brei thâo:

“Tui si phung thơ̆ng kơ bruă lač, klei bi kiă kriê boh nik mơ̆ng Êpul Gơ̆ng bruă djuê ana čiăng dưi thâo ƀuh ti jing klei djŏ, lehanăn klei ka djŏ, klei dleh dlan hŏng lăn dôk, lehanăn lăn pla mjing kơ mnuih ƀuôn sang. Anăn yơh jing hdră êlan anăp truh leh mâo klei bi mlih kơ hdră bhiăn lăn ala tal anei. Hŏng djăp mta klei čiăng msĕ snăn, drei mâo tŭ mă, lač jăk truh kơ 12 klei blŭ mơ̆ng phung bi ala. Drei bi hrŏng ruah ya mta bruă djŏ tuôm hŏng mta mtrŭn mơ̆ng klei čih mkra jing klei bi ala kơ krĭng kwar pioh lŏ ksiêm duah, lehanăn mâo klei akâo dŭm hdră êlan kơ krĭng mnuih ƀuôn sang, tal dua, mơĭt kơ anôk čih mkra, kñăm mâo klei bi sa hnơ̆ng”./.