Êbeh 3 mlan anei, hlăk 6 mmông mmăt mơ̆ng knăm sa truh knăm êma grăp hruê kăm, Adŭ mtô bi hriăm răk- čih hră ti sang hră gưl sa Ngô Quyền (ƀuôn hgŭm Chi Lăng, ƀuôn prŏng Pleiku lŏ mâo pui mtrang mngač leh anăn kwang ênai hriăm răk mơ̆ng phung tui hriăm. Adŭ hriăm mâo 30 čô ti ƀuôn Ia Lang, ƀuôn hgŭm Chi Lăng, ƀuôn prŏng Pleiku. Leh hriăm čih dŭm boh hră phung nai čih, Amai H’Thiếu, sa čô amĭ 3 čô anak nao hriăm adŭ anei, brei thâo:

        “Êlâo dih, gŏ sang kâo ƀun, ama djiê hnưm, klei găl gŏ sang amâo brei anăn kâo amâo dưi nao sang hră ôh, anăn kăn thâo hră rei. Mrâo êgao, mâo khua ƀuôn, ƀuôn hgŭm leh anăn sang hră mđĭ ai, kâo gĭr nao sang hră čiăng thâo boh hră. Dŭm hruê nao hriăm suăi snăk, ƀiădah kâo čiăng thâo dlăng, thâo čih, anăn srăng gĭr hriăm”.

 Ti adŭ hriăm,  H’Lung (57 thŭn, ti ƀuôn Ia Lang, ƀuôn hgŭm Chi Lăng) ăt dôk hriăm čih boh hră mrô tal êlâo. Ñu brei thâo, khua thŭn leh, anăn klei thâo hriăm amâo hmao ôh phung mda asei hlăm adŭ, khădah snăn hŏng klei gĭr čiăng kơ pô amâo kthŭl mluk anăn kreh kriăng nao ti adŭ. Ară anei ñu thâo răk, thâo čih leh anăn pô.

        “Kâo amâo thâo hră ôh, kăn thâo tĭng yap rei, dưi nao sang hră thâo boh hră, čih anăn pô kâo mơak snăk, bi mni lač jăk kơ nai bi hriăm leh kâo leh anăn kơ grăp čô mnuih”.

 Hlue si nai Dương Thị Kiếu - sang hră gưl sa Ngô Quyền, ƀuôn hgŭm Chi Lăng, ƀuôn prŏng Pleiku, boh tŭ ksiêm dlăng tal êlâo mơ̆ng sang hră brei ƀuh, ƀuôn Ia Lang mâo hlăm brô 100 čô amâo thâo hră. Tơdah dưi mtrŭt mjhar nao hlăm adŭ hriăm lu mnuih dôk hêñ kyua khua thŭn leh, đa đa dôk ñŭt ai tiê kyua pô amâo dưi mâo klei thâo. Khădah snăn, leh nao ti adŭ hriăm sa wưng, grăp čô khăp, bi jak nao hriăm lu hĭn.

        “Adŭ hriăm lu jing phung khua thŭn, amâo mâo klei găl nao hriăm, tơdah truh tinei boh hră hŏng diñu dleh snăk ƀiădah diñu khăp hriăm, wăt tơdah adiê hjan snăn diñu ăt nao djăp ênŭm. Ară anei grăp čô thâo čih leh jih jang, bi răk snăn thâo răk raih hlăm adŭ mâo êbeh 50%.”

 Msĕ snăn mơh, Sang hră gưl sa Lê Lai, să Čư̆ Á, ƀuôn prŏng Pleiku, jing sa hlăm 7 anôk mtô bi hriăm ti ƀuôn prŏng dưi ruah hlue ngă bruă mtô bi hriăm leh anăn čih kơ mnuih ƀuôn sang krĭng djuê ƀiă hlue si Hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng wưng 2021-2030.

 Nai Lê Minh Tùng- Khua sang hră gưl sa Lê Lai brei thâo, sang hră bi hgŭm hŏng Knơ̆ng bruă sang čư̆ êa să Čư̆ Á leh anăn dŭm alŭ, ƀuôn ktuê dlăng ênoh mnuih djuê ƀiă ka thâo răk, thâo čih hlăm gưl thŭn 15 truh 60, čiăng mtrŭt mjhar mnuih ƀuôn sang hgŭm nao hriăm.

        “Sang hră ăt mkŏ mjing leh êpul mtrŭt mjhar phung hriăm mơ̆ng 15 truh 60 thŭn nap hriăm leh anăn ară anei mâo 23 čô nao hriăm. Hdră lăm lui klei amâo thâo hră dưi mbha 2 wưng, wưng tal sa mâo 3 gưl, bi kbar hŏng 42 hruê kăm, bi knar hŏng grăp gưl jing 315 mmông mtô, wưng 2 dưi mbha jing 2 gưl, bi knar hŏng adŭ 4 leh anăn adŭ 5 snăn bi leh hdră hriăm”

 Hjăn thŭn anei, Knơ̆ng bruă sang hră mtô bi hriăm čar Gia Lai srăng bi hgŭm hŏng Anôk bruă djuê ana leh anăn dŭm anôk bruă djŏ  tuôm kčĕ kơ Knơ̆ng bruă sang čư̆ êa čar mbha prăk bi liê kơ dŭm alŭ wăl čiăng pŏk 217 adŭ kơ êbeh 6.500 čô. Nguyễn Văn Đông - Khua adŭ bruă sang hră gưl sa, hđeh điêt, Knơ̆ng bruă sang hră mtô bi hriăm čar Gia Lai brei thâo:

“Anei jing hdră ba klei hdĭp kơ mnuih djuê ƀiă leh anăn ti Gia Lai dưi mđĭ klei thâo săng, čiăng mơ̆ng anăn tlaih ƀun, mđĭ hnơ̆ng jăk klei hdĭp pô. Ară anei hdră anei dưi mbha kơ dŭm kdriêk, wăl krah, ƀuôn prŏng, dŭm anôk bruă kƀĭn phung hriăm čiăng thâo kơ hdră hriăm. Hlăm wưng kơ anăp, hdră srăng dưi pŏk mlar leh anăn pŏk ngă hdră mtô lar ƀar ti dŭm alŭ wăl”.

 Hlue si hdră kčah hlue ngă Hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng wưng 2021-2025, čar Gia Lai mkŏ mjing 735 adŭ mtô răk - čih kơ giăm  23.500 čô mnuih ti 176 să.