Hlăm klei kƀĭn trông, Phung bi ala nao hgŭm mâo lu klei blŭ bi mguôp yuôm bhăn kơ Klei bhiăn yua lăn ala (mkra mlih). Khua gĭt gai dŭm čar krĭng Lăn Dăp Kngư leh anăn čar Ninh Thuận, Bình Thuận brei thâo, leh mâo hdră mtrŭn mrô 671/NQ-UBTVQH15 hruê 23/12/2022 mơ̆ng Dhar bruă gĭt gai bruă kƀĭn ala leh anăn hdră êlan mơ̆ng knŭk kna kơ bruă mă klei blŭ bi mguôp mnuih ƀuôn sang hŏng hdră klei bhiă lăn ala (mkra mlih), dŭm alŭ wăl mkŏ mjing leh lu klei kƀĭn trông, lu mbah hâo hưn, mă boh blŭ kluôm mnuih ƀuôn sang.

Dŭm boh klei kñăm mơ̆ng hdră klei bhiăn msĕ si: Čuăl mkă, hdră êlan yua lăn, hrui wĭt lăn, hdră êlan tla hnô, mkăp anôk dôk mrâo, mđĭ kyar keh lăn, jao lăn, brei mưn lăn, mlih mta kñăm yua lăn, bi klă lăn yua, hdră êlan ngăn prăk, ênoh lăn, hdră kriê dlăng, yua dŭm mta lăn, mbha gưl, ksiêm dlăng, ktuê dlăng klei dưi, gŏ sang yua lăn… mâo klei kƀĭn trông hlăk mblang, nao hgŭm bi mguôp klei blŭ hluê si boh sĭt lăn ala ti krĭng Lăn Dăp Kngư.

Dŭm klei blŭ bi mguôp lač, krĭng Lăn Dăp Kngư mâo dŭm klei mdê hjăn, boh nik jing hƀuê ênuk, mnuih ƀuôn sang hriê dôk êngiê, jing krĭng mâo lu djuê ana mnuih djuê ƀiă, lăn dliê jing lu hĭn… Kyuanăn, hlăm dŭm mta phŭn srăng mâo klei čuăn klă leh anăn amâo mâo bi sô̆ hŏng dŭm klei bhiăn mkăn. Boh nik jing bruă kriê dlăng lăn lŏ hma, lăn dliê, hdră êlan lăn yua kơ mnuih ƀuôn sang jing mnuih djuê ƀiă, klei čuăn ktuê dlăng anôk mnia mblei… Nguyễn Ngọc Sâm, k’iăng khua bruă sang čư êa čar Kon Tum brei thâo:

“Leh hluê ngă hdră mtrŭn mrô 118, čar Kon Tum čuăl mkă leh ênhă lăn mâo klei ksĭng mmiă, ênhă lăn mơ̆ng knơ̆ng bruă amâo mâo yua srăng jao wĭt kơ alŭ wăl. Ară anei klei dleh dlan hĭn čiăng mgaih msir lăn anei kyua lu mnuih ƀuôn sang yua ênhă lăn anei, yua soh mta kñăm. Leh klei bhiăn yua lăn mkra mlih lŏ čiăng mâo dŭm hdră êlan klă klơ̆ng, čiăng mâo dŭm klei čuăn čiăng mgaih msir phung lŏ dơ̆ng yua lăn anei, hlei phung dưi, hlei phung amâo mâo dưi, hnơ̆ng klei brei mưn, amâodah mkăp brei si ngă”.

Blŭ hlăm mmông mă bruă, K’iăng Khua phŭn bruă ngăn dŏ leh anăn wăl hdĭp mda Lê Minh Ngân brei thâo, truh kơ ară anei, dŭm čar hlăm kluôm ala ba mdah leh hdră êlan mă klei blŭ mnuih ƀuôn sang hŏng hdră klei bhiăn lăn ala mkra mlih. Lu alŭ wăl hluê ngă truh kơ gưl să.

Hluê si Lê Minh Ngân, Phŭn bruă ngăn dŏ leh anăn wăl hdĭp mda srăng hmar mơĭt klei hưn mă klei blŭ mnuih ƀuôn sang kơ klei bhiăn mơ̆ng dŭm alŭ wăl, Phŭn dhar bruă brei kơ Dhar bruă duh mkra, Dhar bruă klei bhiăn mơ̆ng bruă kƀĭn ala. Hluê anăn, dŭm anôk bruă mơ̆ng bruă kƀĭn ala ăt srăng ksiêm dlăng bruă hrui mă, hlăk mblang klei blŭ bi mguôp mơ̆ng mnuih ƀuôn sang mơ̆ng dŭm anôk bruă čih mkra. Rơ̆ng kơ klei bhiăn yua lăn mkra mlih bi djăp ênŭm hnơ̆ng čoh čuăn mđĭ kyar ala čar, msĕ hŏng klei hmăng hmưi mơ̆ng mnuih ƀuôn sang leh anăn bruă klam mơ̆ng hdră mtrŭn mrô 18 NQ/TW hruê 16/6/2022 kơ bruă lŏ dơ̆ng mlih mrâo, bi kluôm hdră ngă bruă, hdră êlan, mđĭ boh tŭ dưn klei kriê dlăng leh anăn yua lăn, mkŏ mjing boh kdrŭt ba ala čar anei jing ala čar mâo hnư hrui wĭt lu. Lê Minh Ngân, k’iăng khua Phŭn bruă ngăn dŏ leh anăn wăl hdĭp mda lač:

    “Srăng mñă klă anei jing gưl mă klei blŭ mnuih ƀuôn sang hŏng klei bhiăn yua lăn jing klei ngă bruă kđĭ čar, yang ƀuôn prŏng leh anăn kluôm ênŭm. Hlăm klei mă bruă hŏng dŭm alŭ wăl hlăm klei kƀĭn trông hruê anei, dŭm alŭ wăl hưn mdah ngă leh truh kơ gưl să, mñă kơ drei lŏ dơ̆ng uêñ mĭn kơ dŭm mta phŭn mdê hjăn ti krĭng Lăn Dăp Kngư. Phŭn bruă ngăn dŏ leh anăn wăl hdĭp mda lač jăk kơ phung khua gĭt gai alŭ wăl hriê hŏng klei kƀĭn hruê anei hŏng ai tiê bruă klam, dŭm klei dblŭ bi mguôp dưi mprăk jăk, dưi mklin mơ̆ng lu anôk čiăng đru mguôp kơ dŭm anôk bruă čih mkra, anăn jing Phŭn bruă ngăn dŏ leh anăn wăl hdĭp mda hlăm bruă mă klei blŭ bi mguôp mơ̆ng mnuih ƀuôn sang leh anăn ngă klei hưn mdah hlăk mblang êdei anăp.