Mơ̆ng dŭm hruê akŏ thŭn 2023, Dhar bruă djuê ana mkŏ mjing leh klei kƀĭn trông kluôm ala ksiêm wĭt bruă djuê ana thŭn 2022, ksiêm wĭt 1 thŭn hluê ngă hdră ala čar kñăm mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng wưng thŭn 2021 – 2030 leh anăn ba mdah bruă klam thŭn 2023. Kyua klei gĭt gai ktang phĭt mơ̆ng knŭk kna, klei gĭr mơ̆ng mnuih ƀuôn sang dŭm djuê ana hlăm bruă hluê ngă ktang phĭt dŭm hdră êlan djuê ana, hdră bi hơĭt klei hdĭp yang ƀuôn, kyuanăn klei hdĭp mnuih ƀuôn sang dŭm djuê ana mnuih djuê ƀiă mâo klei hơĭt leh anăn ƀrư̆ hruê ƀrư̆ đĭ kyar. Thŭn 2022, hnơ̆ng gŏ sang ƀun ƀin ti krĭng mnuih djuê ƀiă hrŏ êbeh 3%. Khua phŭn bruă, Khua kiă kriê Dhar bruă djuê ana Hầu A Lềnh brei thâo, thŭn 2023, bruă yuôm bhăn tal êlâo jing hlue ngă dŭm hdră mkăp hlăm hdră mặt trận čar kwar hŏng ênoh prăk lu mơ̆ng thŭn 2022 ba kơ hdră êlan thŭn 2023.

Hlue si klei hưn mơ̆ng Knơ̆ng bruă mặt trận kdriêk Lâm Hà, čar Lâm Đồng, 5 thŭn êgao Knŭk kna duh bi liê êbeh 45 êklai prăk mơ̆ng lu phŭn prăk kơ mnuih djuê buă hlăm kdriêk. Hlăm anăn, năng mđing hĭn jing đru mkra sang dôk leh anăn mjing hdră du ƀơ̆ng kơ mnuih ƀuôn sang đĭ kyar. Boh nik, hlăm gdră đru prăk mkra mjing, bruă sang čư̆ êa leh anăn bruă djŏ tuôm đru kơ ƀĭng ngă lŏ hma mđĭ kyar bruă pla ana rông hluăt mă mrai. Ară anei, Lâm Hà jing alŭ wăl mâo ênhă ana rông hluăt mă mrai prŏng hĭn Lâm Đồng hŏng êbeh 3.620 ha. K’Tân- K’iăng khua bruă mặt trận kdriêk Lâm Hà lač: “Êlâo dih Đảng Knŭk kna ăt mđing dlăng lu, leh anăn ară anei snăn mđing dlăng lu hĭn. Klă klơ̆ng msĕ si đru kơ mnuih ƀun mkŏ mjing sang dôk, đru hdră duh ƀơ̆ng. Anăn jing đru prăk pla ana rông hluăt mă mrai, grăp gŏ sang 20 êklăk prăk amâodah 50 êklăk prăk. Amâodah đru hŏng bruă mkŏ mjing sang dôk mrâo kơ mnuih ƀun amâo mâo sang dôk, grăp boh sang mâo ênoh 50 êklăk prăk. Gŏ sang mguôp thiăm mơ̆ng 10 -20 êklăk prăk čiăng mkra sang dôk kjăp. Bruă mặt trận Việt Nam kdriêk Lâm Hà hmei ngă bruă ktuê dlăng ala ƀuôn, knuă druh hlăm bruă đru kơ mnuih ƀuôn sang mđĭ kyar bruă duh mkra gĭr ktưn kpưn đĭ kơ mdrŏng.”

Kdriêk Lạc Dương, čar Lâm Đồng mâo giăm 70% mnuih ƀuôn sang jing mnuih djuê ƀiă. Kyua bi lar boh tŭ dưn dŭm hdră duh bi liê mơ̆ng hdră ala čar kñăm, mkŏ mlih ana pla mjing, ba klei kreh knhâo, hdră mnêč hlăm klei ngă bruă lŏ hma hŏng êlan mrâo mrang, kyuanăn hnơ̆ng gŏ sang ƀun ƀin hrŏ ktang. Hluê si Cill Poh, k’iăng khua bruă sang čư̆ êa kdriêk Lạc Dương, khădah hlăm 2 thŭn êgao tŭ klei hmăi mơ̆ng klei ruă tưp Covid-19, ƀiădah dŭm mta mnơ̆ng dhơ̆ng bruă lŏ hma msĕ si ana êa drao Atiso, mnga, djam mtam leh anăn kphê…mâo anôk ba čhĭ hơĭt, ênoh đĭ, kyuanăn klei hdĭp mnuih ƀuôn sang mâo klei đĭ kyar, hnơ̆ng gŏ sang ƀun ƀin hlăm kdriêk hrŏ mơ̆ng 8,6% jing 5,8%, êgao hdră kčah mâo leh. “Hlăm klei ngă bruă thŭn leh êgao, mnuih ƀuôn sang hmei thâo ngă bruă lŏ hma dưn yua kdrăp mrâo mrang, msĕ si djam mtam, mnga hlăm sang ală kĭng, sang ñuăl, kyuanăn klei hdĭp mda gŏ sang mâo leh klei đĭ kyar. Bi kơ bruă mkŏ mkra krĭng ƀuôn sang mrâo, jih jang să, wăl krah hlăm kdriêk dưi mâo ênŭm hnơ̆ng čoh čuăn, dưi rơ̆ng klei êđăp ênang. Mnuih ƀuôn sang thâo săng leh anăn thâo hdră duh ƀơ̆ng, thâo čŏng pô duh bi liê mđĭ kyar klei hdĭp gŏ sang. Kyuanăn, hnơ̆ng gŏ sang ƀun ƀin hrŏ êgao hdră kčah dưi jao”.