Trần Văn Hòa, pô hô̆ trah kan BTh 95032TS ti să Phước Thể, kdriêk Tuy Phong, čar Bình Thuận tuôm lĕ hlăm klei ngă soh hiu trah mă kan amâo mâo hưn, amâo mâo hră mơar klei dưi, amâo mâo čih pioh lehanăn amâo mâo hưn ôh si êlan pô đuĕ hiu trah mă kan, kan hưn rei klei pô mŭt kbiă hlăm kdrŭn čhĭ kan hdang. Ară anei jih jang klei soh anăn amâo lŏ mâo ôh. Kyua mâo leh kahan răng mgang knông lăn mta mtăn kčĕ đru kơ klei bhiăn knŭk kna, lehanăn bi mbha êlan hiu trah mă kan hlăm êa ksĭ kơ Hoà lehanăn kơ jih jang phung trah mă kan thâo. Mbĭt anăn kahan răng mgang knông lăn lŏ ktrâo atăt kơ mnuih ƀuôn sang si hdră trah mă kan jing djŏ klei bhiăn, amâo mâo ba klei jhat ôh kơ wăl êa ksĭ ala čar mkăn, lehanăn đru mghaih msir dŭm klei amâo mâo jăk hlăm êa ksĭ:

Leh mâo kahan răng mgang knông lăn đru čĕ mtô mblang snăn pô thâo săng, lehanăn pô lŏ bi mtruh hŏng ƀĭng trah mă kan amâo lŏ ngă soh ôh. Truh mmông phung trah mă kan čiăng snăn mâo mtam kahan răng mgang knông lăn   đru lehanăn ktrâo atăt mtam. Sitôhmô, leh mâo dŭm klei amâo mâo jăk hlăm êa ksĭ, tơdah ƀuh dŭm mnơ̆ng trah mă kan mơ̆ng pô mkăn soh hŏng klei bhiăn snăn pô nao hưn hŏng kahan răng mgang knông lăn, diñu tiŏ hriê nao mghaih msir jih jang klei amâo mâo jăk”.

Truh ară anei, lu phung trah mă kan mơ̆ng Bình Thuận thâo săng leh jih klei yuôm bhăn mơ̆ng bruă čih pioh, hưn êlan pô hiu trah mă kan, ngă djŏ hŏng hdră êlan ktrâo atăt mâo (VMS). 100% jih jang pô hô̆ trah kan, khua kiă kriê bruă trah mă kan kbưi hŏng hang mâo sơăi klei kuôl kă amâo mâo ngă soh ôh hŏng klei bhiăn hiu trah mă kan, amâo mâo ñu kma hlăm wăl êa ksĭ ala tač êngao ôh. Huỳnh Hương, pô mgăt hô̆ trah kan BTh 84025TS ngă bruă đoh jal ti wăl krah Liên Hương, kdriêk Tuy Phong, čar Bình Thuận yăl dliê:

Kahan răng mgang knông lăn Liên Hương kreh bi tuôm nanao hŏng phung trah kan čiăng kăp kčĕ kơ djăp mta boh klei hlăm êa ksĭ. Kơ yan adiê jăk amâodah hơăi, bi tơdah tuôm hŏng klei amâo mâo jăk hlăm êa ksĭ bi hưn hŏng kahan răng mgang knông lăn. Snăn ayŏng adei lĭng kahan mâo klei mđing hĭn êdi kơ mnuih trah mă kan.

Amâo mâo djŏ knŏng hâo hưn mtô mblang, kơ klei bhiăn, mđĭ ai mnuih ƀuôn sang hiu trah mă kan hlăm êa ksĭ, mđrĭng hŏng bruă kiă kriê êa ksĭ, răng mgang klei dưi êngiê êa ksĭ plao ksĭ lăn čar pô. Kahan răng mgang knông lăn êa ksĭ čar Bình Thuận lŏ bi mguôp hŏng dŭm gưl bruă Đảng, bruă sang čư̆ êa alŭ wăl duh mĭn kơ klei hdĭp mnuih ƀuôn sang hlăm plao ksĭ. Grăp thŭn, kahan răng mgang knông lăn mâo dŭm hdră msĕ si: Keh kyua mnuih ƀun, abŭ braih klei khăp, atăt adei nao sang hră... đru mtam kơ phung ƀuôn sang dôk hlăm klei dleh dlan.

 Hjăn thŭn 2022, klei atăt adei nao sang hră mơar mâo đru leh truh kơ 42 čô hđeh hŏng ênoh prăk 189 êklăk prăk; bi hdră anak rông kahan răng mgang knông lăn mâo dru leh mơh kơ 42 čô hđeh hriă mhră hŏng ênoh prăk truh êbeh 100 êklăk prăk. Kahan răng mgang knông lăn lŏ mkŏ mjing dŭm alŭ wăl ktue hang ksĭ čar Bình Thuận mdơ̆ng mâo 3 boh sang bi đru, mđup brei truh 9 tôn braih kơ dŭm gŏ êsei lĕ hlăm klei dleh dlan... Huỳnh Đình Dũng, k’iăng khua knơ̆ng bruă sang čư̆ êa să Phước Thể, kdriêk Tuy Phong, čar Bình Thuận brei thâo:

Ti alŭ wăl dŭm boh să mâo kđông kahan răng mgang knông lăn dôk snăn mâo klei bi mguôp jăk plah wah bruă sang čư̆ êa, dŭm êpul dhar bruă ti alŭ wăl mbĭt hŏng mnuih ƀuôn sang, boh nik phunt hiu trah kan hlăm klei kjăp êdi. Snăn ai tiê plah wah phung trah mă kan hŏng kahan răng mgang knông lăn mâo lŏ hyuă kjăp hĭn.

Đại tá Đinh Văn Sáu, khua bruă Đảng, khua kiă kriê kahan răng mgang knông lăn čar Bình Thuận brei thâo, hâo hưn hdră êlan mơ̆ng knŭk kna truh hŏng mnuih ƀuôn sang, hlăm anăn mâo phung trah kan, anăn yơh jing bruă čuăn mơ̆ng kahan răng mgang knông lăn. Bruă anei mâo nanao grăp čô kahan răng mgang knông lăn păn kjăp kñăm ngă jăk hĭn, ba wĭt klei tŭ dưn hĭn kơ thŭn êlâo:

Si srăng ngă kñăm čiăng iêo jak jih klei thâo bi mguôp mơ̆ng mnuih ƀuôn sang, kñăm mkŏ mjing bruă răng mgang klei êđăp ênang kjăp mơ̆ng jih jang mnuih ƀuôn sang, mơ̆ng anăn dưi bi leh jăk bruă čuăn răng mgang klei dưi êngiê knông lăn pô. Mbĭt hŏng anăn mđing ngă jăk bruă mkŏ mjing Đảng, mđĭ hĭn bruă klam mơ̆ng grăp čô đảng viên. Kyua anei jing êpul knơ̆ng pioh kiă kriê kjăp hĭn bruă hlăm wưng kơ anăp.

Bình Thuận mâo hang ksĭ dlông êbeh 192km, mâo êbeh 5.700 boh hô̆ trah mă kan hŏng boh dlông hô̆ mơ̆ng 6m kơ dlông, hlăm anăn mâo 1.946 boh hô̆ trah kan mâo boh dlông mơ̆ng 15m kơ dlông hiu trah mă kan kbưi hŏng hang. Klei hiu trah mă kan mjing leh bruă mă kơ êbeh 46.000 čô mnuih, hlăm anăn mâo hlăm brô 15.000 čô mnuih hiu trah kbưi hŏng hang. Bruă hiu trah kan khădah dôk tuôm hŏng lu klei dleh dlan, klei huĭ hyưt, ƀiădah mâo leh klei mđing uêñ mơ̆ng knŭk kna, lehanăn bruă sang čư̆ êa alŭ wăl, lehanăn mbĭt hŏng kahan răng mgang knông lăn, snăn phung trah kan Bình Thuận lŏ dưi mđĭ ai hĭn leh hiu trah mă kan kbưi hŏng hang, bi êdah klei kiă kriê êa ksĭ êjai, bi mklă klei dưi răng kriê wăl êa ksĭ lăn čar pô./.