Klei yăl dliê ti Kđông kahan răng mgang knông lăn Huổi Luông, ti să Huổi Luông, kdriêk Phong Thổ, čar Lai Châu jing klei bi mklă kơ bruă ngă tui hriăm leh anăn hlue ngă knhuah mngač Hồ Chí Minh dôk mkŏ mjing kdrưh kơăm hlăm êpul kahan, klă sĭt leh anăn klă klơ̆ng.

          Giàng Mý Só jing sa hlăm 5 čô hđeh hriăm hră dôk hlăm klei dleh dlan mâo kđông kahan răng mgang knông lăn Huổi Luông, kdriêk Phong Thổ, čar Lai Châu tŭ jum rông ba, đru grăp mlan truh 500 êbâo prăk. Mgei ai tiê yăl dliê klei anei adei Só brei thâo: Thŭn anei adei dôk hriăm adŭ 5 leh, tơdah amâo mâo ôh kahan răng mgang knông lăn rông ba sĭt nik kâo mâo mâo truh nao sang hră mơar ôh:

Klei hdĭp gŏ sang kâo bŏ hŏng klei dleh dlan, amâo mâo braih huă, mâo hĕ lĭng kahan đru atăt nao sang hră mơar, đru hlăm grăp mlan 500 êbâo prăk, kâo pioh blei hră mơar, mnơ̆ng mnuă yua hlăm klei hriăm hră, lehanăn pioh mkuôm blei braih huă. Phung lĭng kahan đru, snăn kâo gĭr hriăm hră mơar, amâo lŏ mdei ôh.

          Thiếu tá Nguyễn Hữu Kiểm, Pô ngă Bruă kđi čar kđông kahan răng mgang knông lăn Huổi Luông lač: Mâo hdră “Đru adei nao sang hră mơar” lehanăn hdră “Anak rông kahan răng mgang knông lăn” jing leh sa hlăm dŭm bruă bŏ hŏng klei khăp. Kyuanăn, mơ̆ng leh ngă bruă anei êpul lĭng kahan ngă leh bruă hâo hưn, mtrŭt mjhar lĭng kahan bi mkrum, lehanăn iêo jak klei bi đru mơ̆ng dŭm êpul bruă, grăp čô mnuih kñăm čiăng đru rông ba phung hđeh.

         Mâo klei đru hŏng prăk, êpul kahan răng mgang knông lăn lŏ tiŏ nao knuă druh  lĭng kahan đru nao wiă mdiê. Lehanăn mâo klei bi mguôp hŏng bruă sang čư̆ êa ksiêm yap dŭm gŏ sang dôk hlăm klei dleh dlan, ƀiădah ka mâo klei đru ba ôh, snăn čiăng mâo klei iêo mthưr mơ̆ng phung mâo ai tiê thâo pap mđup brei mnơ̆ng mnuă yua, prăk đru hriăm hră mơar ƀri hlăm hrue mŭt hriăm thŭn hriăm mrâo, hrue phung hđeh hrue 1/6, amâodah hrue mơak mlan pŭr yan hla luh… Anei jing sa hlăm dŭm bruă ngă klă mngač mâo leh kđông kahan răng mgang knông lăn Huổi Luông dôk ngă tui si klei mklă mtrŭn mrô 01 mơ̆ng phŭn bruă kđi čar kơ klei lŏ dơ̆ng ngă asăp mtrŭn mrô 05 kơ klei tui hriăm lehanăn hlue ngă knhuah mngač Hồ Chí Minh. Thiếu tá Nguyễn Hữu Kiểm lač:

          Hlăm wưng giăm anei hĭn, kđông kahan hlue ngă leh hdră êlan mnư̆ mnang ti knông lăn lehanăn mâo leh truh 82 gŏ sang bi hgŭm ti Hồ Thầu hŏng êbeh 3km klông knông lăn lehanăn dŭm mta bruă hmei jao leh kơ dŭm êpul lĭng kahan lehanăn mơ̆ng grăp čô đảng viên ngă nanao hlăm grăp hrue lehanăn grăp hrue kăm pioh hâo hưn mtô mblang lehanăn păn kjăp ai tiê klei mĭn mnuih ƀuôn sang, lehanăn ktrâo atăt leh mnuih ƀuôn sang hlue ngă hdră êlan mnơ̆ng pla, mnơ̆ng rông pioh mđĭ kyar klei hdĭp mda.

         Hŏng bruă čuăn kiă kriê, răng mgang êbeh 13km klông knông lăn lehanăn 15 ƀĕ gơ̆ng knông lăn, mâo 21 boh ƀuôn ngă klei tui hriăm lehanăn hlue ngă knhuah mngač mơ̆ng Awa, nao hlăm klei mtrŭn agha êlam hĭn, mâo klei tŭ dưn hĭn. Bruă Đảng, Êpul khua kiă ktriê kđông răng mgang knông lăn Huổi Luông mkŏ mjing leh klei hriăm lehanăn hlue ngă knhuah mngač mơ̆ng Awa hŏng djăp mta bruă ngă klă mngač, lehanăn mâo jih jang phung knuă druh, đảng viên, lĭng kahan ngă mơ̆ng 1 - 2 mta bruă. Đại úy Tẩn Lở Tông, ti kđông kahan răng mgang knông lăn Huổi Luông, kdriêk Phong Thổ, čar Lai Châu lač:

          Asei mlei kâo leh thâo săng, tui hriăm, hlue ngă tui si knhuah mngač  Hồ Chí Minh, hlăm bruă kiă kriê, răng mgang knông lăn, snăn kâo kčĕ leh bruă Đảng, kơ êpul khua kiă kriê kđông ngă jăk hĭn bruă hiu suang, kiă kriê kjăp klông knông lăn. Kâo nao hâo hưn, mtrŭt mjhar mnuih ƀuôn sang kơ bruă răng mgang knông lăn. Mơ̆ng anăn, mnuih ƀuôn sang mâo klei thâo săng hĭn, lehanăn hlue gưt sĭt êmĭt.

        Hlăm dŭm thŭn êgao, kđông răng mgang knông lăn Huổi Luông mâo nanao klei bi mguôp hŏng bruă sang čư̆ êa alŭ wăl kơ bruă hâo hưn mtô mblang kơ mnuih ƀuôn sang mâo klei thâo săng hĭn hlăm bruă bi đru răng mgang knông lăn, mâo đru leh kơ lu gŏ sang dôk hdĭp hlăm klei dleh dlan, mâo đru leh kơ phung hđeh hriăm hră knap mñai dưi lŏ nao sang hră mơar.

        Mơ̆ng bruă tui hriăm lehanăn hlue ngă knhuah mngač mơ̆ng Awa ti kđông kahan răng mgang knông lăn Huổi Luông mâo ba wĭt leh klei đăo knang kơ mnuih ƀuôn sang djăp djuê ana hlăm knông lăn, lŏ mđĭ hĭn klei jăk siam mơ̆ng phung lĭng kahan ao mtah, đru bi mkŏ mjing êpul lĭng kahan kjăp kluôm ênŭm, bi leh jăk bruă răng kriê klei dưi êngiê, klei êđăp ênang knông lăn ala čar pô./.