Hlăm ai êwa kluôm ala kkuh drông thŭn mrâo 2023 lehanăn Yan mnga Quý Mão anăp truh, Khua knŭk kna Phạm Minh Chính m’ak lehanăn mgei ai tiê nao ti Hdră “Têt kuh kŭm ênŭm ênap – Yan mnga bi hgŭm mguôp thŭn 2023” hŏng mnuih mă bruă ti čar Phú Yên – krĭng lăn jăk siam jiă knhuah gru cách mạng. Khua knŭk kna mñă, anei jing hdră bruă klă sĭt, tŭ yuôm hŏng mnuih mă bruă ƀri wưng Têt truh yan mnga hriê mâo bruă đoàn dŭm gưl mkŏ mjing.

Khua knŭk kna brei thâo, mnuih mă bruă truh 14% ênoh mnuih, 27% êpul mă bruă hlăm yang ƀuôn, grăp thŭn mjing êbeh 65% ênoh mâo mnơ̆ng dhơ̆ng kluôm yang ƀuôn, êbeh 70% ênoh hrui mâo kơ ngăn prăk knŭk kna, klei thâo kơ bruă, klei hluê ngă hdră bhiăn dưi mkra mđĭ. Ênoh mnuih mă bruă mâo hnơ̆ng thâo, ba yua kdrăp mrâo đĭ lu. Boh nik, Khua knŭk kna mgei ai tiê dưi thâo, hlăk klei ruă Covid 19 bluh mâo, lu mnuih mă bruă ăt gĭr dôk ngă bruă, hrăm mbĭt hŏng anôk bruă duh mkra, kluôm ala gang mkhư̆ klei ruă. Truh kơ wưng lŏ wĭt msĕ aguah tlam mrâo, ayŏng amai adei lŏ wĭt mă bruă jih hruê mlam kñăm ba mnơ̆ng “Made in Vịêt Nam” mâo hlăm wăl anôk mnia mblei hlăm lehanăn êngao ala čar.

 “Kâo đăo knang ai êwa h’uh mđao anei srăng hluê mnuih mă bruă wĭt hŏng gŏ sang, hŏng djăp krĭng kñăm dưi mâo sa yan Têt jăk siam, yâo m’ak. Bi hŏng mnuih amâo dưi wĭt ăt dưi drông sa yan Têt m’ak, djăp ênŭm, amâo lui hlei pô dôk ti tluôn ôh”

Khua knŭk kna mñă, Têt djuê ana mâo boh tŭ yuôm hlăm klei hdĭp au tiê klei mĭn, jing wưng grăp čô mnuih Vịêt mđing kơ phŭn agha ana hruê̆, kơ aê aduôn atâo atiêt, dưi kuh kŭm ênŭm ênap, mjing ai êwa hơ̆k kdơ̆k čiăng mŭt hlăm thŭn mrâo mâo lu klei đăo knang, čang hmăng, mđing kơ klei jăk siam hĭn. Bruă mđing dlăng Têt lŏ bi êdah ai tiê hgŭm mguôp, thâo bi đru hdơ̆ng găp mơ̆ng djuê ana drei.

Khua knŭk kna thâo klă dŭm klei dleh dlan, suaĭ êmăn mơ̆ng mnuih mă bruă wưng êgao. Hlăm wưng ti anăp, knŭk kna srăng gĭt gai dŭm Phŭn, dhar bruă, alŭ wăl mđing msir mghaih dŭm bruă phŭn kñăm mkra mđĭ klei hdĭp mnuih mă bruă. Hlăm anăn, mđing pŏk ngă Hdră rŭ mdơ̆ng 1 êklăk gŏ sang yang ƀuôn mbĭt anăn mjêč mâo hdră msir klă sĭt čiăng mđĭ kyar sang dôk kơ mnuih mă bruă. Mta kñăm jing digơ̆ dưi dưn boh tŭ mđĭ kyar mơ̆ng lăn čar; čiăng grăp blư̆ Têt truh yan mnga hriê jing mmông bi kuh kŭm ênŭm ênap, hơ̆k m’ak mơ̆ng phung mă bruă hŏng gŏ sang pô.

Anei jing boh kdrŭr yuôm bhăn čiăng leh Têt, ayŏng amai adei wĭt mă briă hŏng ai êwa gĭr ktưn mrâo, bi leh jih bruă klam, đru mđĭ kyar anôk bruă duh mkra, mđĭ kyar lăn čar kyua mta kñăm mnuih ƀuôn sang sah mdrŏng, ala čar kjăp ktang, ngă phŭn mil pô, mtăp mđơr, kreh dhar, čiăng kơ grăp čô dưi mâo klei hdĭp jăk siam hĭn. Kâo čiăng m’ĭt asăp h’êč hmưi thŭn bhang mrâo jăk siam truh kơ mnuih mă bruă kluôm ala. H’êč hmưi grăp gŏ sang, mnuih mă bruă mâo hruê Têt h’uh mđao, jăk m’ak.

Bi ala phung khua kiă kriê Đảng, Knŭk kna, Khua knŭk kna m’ĭt leh asăp čuă êmuh lehanăn h’êč hmưi thŭn mrâo êđăp ênang, yâo m’ak, đĭ kyar lehanăn bi mni, čih yap dŭm boh tŭ dưn mơ̆ng êpul bruă công đoàn, mnuih mă bruă kluôm ala, phung ayŏng amai adei čar Phú Yên dưi mâo wưng êgao, đru mguôp hlăm boh tŭ mơ̆ng ala čar. Ti knăm anei, Khua knŭk kna Phạm Minh Chính lehanăn phung khua Êpul hgŭm mnuih mă bruă Vịêt Nam, čar Phú Yên lehanăn Dhar bruă mặt trận Vịêt Nam mđup brei leh 220 hnư mnơ̆ng Têt kơ phung đoàn viên, mnuih mă bruă êdah kdlưn lehanăn mâo klei hdĭp dleh dlan, hŏng ênoh jih jang hlăm brô 288 êklăk prăk./.