Hlăm knăm mtrŭt mjhar, Khua gĭt gai gưl dlông Êpul gru bi kal hrah Việt Nam Bùi Thị Hòa hâo hưn, Phŭn bruă kđi čar tiŏ nao leh Võ Văn Thưởng, Khua hlăm phŭn bruă kđi čar, Khua lăn čar jing khua gĭt gai Êpul gru bi kal hrah Việt Nam wưng thŭn 2022 – 2027. Khua lăn čar brei thâo srăng lŏ dơ̆ng hur har đru mguôp kơ klei đĭ kyar êpul leh anăn bruă ngă jăk hlăm kluôm ala hlăm wưng kơ anăp.

Thŭn anei, gĭr iêo mkrum ƀiă êdi 400 êklai prăk čiăng đru kơ 1 êklăk gưl čô mâo klei hdĭp dleh dlan, hlăm anăn mđing tal êlâo kơ phung mă kan hdang ƀun ƀin, dleh dlan leh anăn phung hđeh ƀun ƀin,  amâo mâo jăk asei mlei srăng mâo klei đru krang mơ̆ng phung mâo ai tiê kmah hlăm leh anăn êngao ala čar. Khua lăn čar iêo mthưr dŭm anôk bruă, êpul êya, knơ̆ng bruă, dŭm êpul êya tar rŏng lăn, phung mâo ai tiê kmah leh anăn dŭm gưl mnuih ƀuôn sang lŏ dơ̆ng bi mguôp, đru, hrăm mbĭt hŏng Êpul gru bi kal hrah Việt Nam hlăm bruă đru dŏng ƀrư̆ hruê ƀrư̆ tŭ dưn  kơ mnuih ƀun ƀin, phung mâo klei hdĭp dleh dlan.