Mmăt hruê 11/3, hluê si mmông alŭ wăl, Êpul gơ̆ng prŏng ƀĭng hgŭm nghị viện tar rŏng lăn (IPU) tal 146 kčưm pŏk leh ti ƀuôn prŏng phĭn Manama, ala čar Bahrain. Hŏng akŏ “Mtrŭt mđĭ klei hdĭp mda êđăp ênang leh anăn yang ƀuôn ñŭ kma kơ jih jang mnuih: bi kdơ̆ng hŏng klei amâo mâo klei pap”, IPU-146 iêo jak klei nao hgŭm mơ̆ng hlăm brô 2.000 čô bi ala mơ̆ng 140 ala čar, hlăm anăn mâo 44 čô Khua bruă kƀĭn ala leh anăn giăm 30 čô k’iăng Khua bruă kƀĭn ala.

Hlăm klei kƀĭn trông, phung bi ala nghị viện srăng bi trông kơ klei mĭn leh anăn đa đa boh klei msĕ si hdĭp mbĭt êđăp ênang, mbĭt anăn ksiêm êmuh leh anăn bi trông kơ klei đa da boh klei mjêč msĕ si klei ksŭng ngă hlăm mạng leh anăn phung ngă soh, čhĭ mnia phung hđeh êrĭt amĭ ama, bi hroh êwa čhŏ carbon leh anăn klei mlih yan adiê, gang mkhư̆ klei hưn soh čhuai, dŭm mta phŭn mđĭ klei bi roh leh anăn klei bi kah phung hlăm wăl mạng.