Êpul bruă hgŭm anei mâo truh 23 êklăk čô knuă druh, mnuih ngă bruă, dôk ngă bruă hlăm 140 êbâo êpul hgŭm lehanăn 125 êbâo êpul kiă kriê bruă mtrŭt mjhar. Hlăm wưng leh êgao, dŭm gưl êpul hgŭm mâo leh bruă klam jing êpul knơ̆ng kơ jih bruă mtrŭt mjhar jih jang mnuih bi hriăm mjuăt nanao tơl jih klei hdĭp. Năng mđin hĭn êdi, thŭn 2022, keh mtrŭt mjhar hriăm hră mơar Việt Nam đru leh kơ bruă lŏ mkra wĭt sang hră leh jhat rai, đru mkăp prăk hriăm hră mơar hŏng hđeh hriăm hră ƀun hriăm thâo hŏng ênoh jih jang êbeh 12 êklai prăk.

Blŭ hrăm ti anôk mă bruă anei, k’iăng khua knŭk kna Trần Hồng Hà čang hmăng kơ êpul hgŭm mtrŭt mjhar hriăm hră mơar Việt Nam jih ai tiê duh myơr, mâo nanao klei đru mguôp yuôm bhăn hŏng bruă mjuăt bi hriăm, kñăm mđĭ kyar anak mnuih. Mjing knơ̆ng kơ bruă mkŏ mjing yang ƀuôn khăp kơ klei hriăm mjuăt, mkŏ mjing lu hdră bi hmô hlăm klei hriăm mjuăt, gŏ sang thâo hriăm mjuăt, djuê găp thâo hriăm mjuăt, yang ƀuôn thâo hriăm mjuăt./.