Hruê mbruê 7/6, k’iăng Khua lăn čar Võ Thị Ánh Xuân  bi tuôm leh hŏng phung bi ala nao hgŭm hlăm klei pơ̆ng nưh “Mnga Yang hruê” thŭn 2023. Anei jing dŭm hlâo amĭ anak êdah êdi mơ̆ng 39 čar, ƀuôn prŏng hlăm hdră “Amĭ pô rông” mơ̆ng Êpul hgŭm bruă phung mniê gưl dlông mtrŭt mjhar. Leh giăm 2 thŭn mkŏ mjing, hdră mâo êbeh 32 êbâo čô Amĭ pô rông, iêo mkrum êbeh 115 êklai prăk đru kriê dlăng 19 êbâo 760 hđeh êrĭt êrin, hlăm anăn mâo êbeh 3000 čô hđeh êrĭt kyua klei ruă tưp Covid-19.

K’iăng Khua lăn čar mñă ktang, hdră klă klơ̆ng jing leh anôk knang čiăng bi lar klei khăp kơ phung hđeh êrĭt êrin hlăm kluôm ala. K’iăng Khua lăn čar mtă kơ Êpul hgŭm bruă phung mniê Việt Nam lŏ dơ̆ng mtrŭt mđĭ klei ngă bruă, klei kjăp mơ̆ng klei bi hmô “Amĭ Pô rông”. Hlăm wưng kơ anăp, Êpul hgŭm bruă phung mniê ksiêm duah leh anăn bi lar thiăm dŭm klei bi hmô djŏ guôp hŏng bruă klam dưi jao čiăng đru thiăm kơ phung mniê, phung hđeh mâo klei hdĭp dleh dlan dưi mâo klei găl đĭ kyar jăk.