Truh ară anei, hŏng klei jih ai tiê mơ̆ng êpul bruă djŏ tuôm hŏng klei gĭr hâo hưn, mtô mblang, kăp ktuê dlăng, rơ̆ng êđăp ênang mơ̆ng bruă sang čư̆ êa alŭ wăl, klei êđăp ênang lŏ wĭt msĕ yang đar ti kdriêk Čư̆ Kuiñ, čar Dak Lak.

Lŏ truh kơ Ea Ktur leh 3 hrue mâo klei rŭng răng, mnuih ƀuôn sang lŏ wĭt hlăm klei hdĭp msĕ si aguah tlam. Ktue êlan dơ̆ng mkŏ krah să hŏng dŭm boh ƀuôn, klei hdĭp lŏ msĕ si yăng đar leh. Čiăng răng mgang klei êđăp ênang kơ mnuih ƀuôn sang, čar Daklak mkŏ mjing leh dŭm anôk dŭm boh pôih kiă răng hrue lehanăn mlam. Snăn mơ̆ng bruă anei ba leh klei hơĭt ai tiê kơ mnuih ƀuôn sang.

 Hnêč êjai yan adiê jăk găl, Ngô Văn Hồng (ti alŭ mrô 22, să Ea Ning, kdriêk Cư Kuin) lŏ trŭn kơ bruă mkra anôk mprăp pla kphê. Jih jang bruă anei gŏ sang ñu ngă leh mơ̆ng dŭm hrue êlâo, ƀiădah mdei hĕ bhiâo leh tuôm hŏng klei rŭng răng, kyuadah lăm hma ñu dôk hlăm krĭng wăl să Ea Ktur. Leh sa êpul mâo phao ktuang ksŭng ngă hlăm knơ̆ng bruă sang čư̆ êa dua boh să Ea Tiêu lehanăn Ea Ktur, gŏ sang ñu ksiêk hĕ êjai bruă knuă kyua huĭ mơh. Ƀiădah, leh ƀuh jih jang klei gĭr mơ̆ng dŭm êpul bruă djŏ tuôm lehanăn mbĭt hŏng bruă hâo hưn, dluih ai tiê mnuih ƀuôn sang mơ̆ng bruă sang čư̆ êa alŭ wăl, snăn ñu hơĭt mơh ai tiê lŏ nao kơ hma mă bruă:

 Ngô Văn Hồng lač: "Leh jih jang bruă ngă bŏ hŏng klei jŭ jhat mơ̆ng êpul mâo phao ktuang mlam hrue 11-6, mnuih ƀuôn sang bŏ hŏng klei kdjăt kƀla, huĭ hyưt. Ƀiădah truh kơ ară anei leh ƀuh êpul bruă djŏ tuôm ngă bruă tui tiŏ hŏng jih ai ktang, mâo bruă sang čư̆ êa hâo hưn hŏng loa bi kčăi asăp, snăn kâo lehanăn jih jang phung ƀuôn sang hlăm alŭ ƀuôn lŏ hơĭt ai tiê leh. Hŏng boh klei msĕ si ară anei, hmei pral lŏ bi hơĭt ai tiê lehanăn lŏ wĭt halwm klei hdĭ msĕ si aguah tlam”.

Leh klei lŏ wĭt pŏk ƀăng čhĭ mnia, pŏk sang tăp kơ mnuih ƀuôn sang kyua dua hruê kđăl hĕ ƀăng kñăm răng mgang klei hdĭp kơ gŏ sang pô amai Nguyễn Thị Anh, să Ea Ktur ăt ka jih mơh klei dôk kdjăt kƀla. Sang mnia ñu ti êlan dơ̆ng, phŭn kbưi mă hŏng sang să Ea Ktur hlăm brô 1 km. Hlăm aguah hrue 11-6, leh hmư̆ hing mâo klei ruăng răng anăn, gŏ sang huĭ hyưt kdjăt kƀla êdi, kđăl jih ƀăng bhă amâo mâo jhŏng kbiă kơ tač, amâo mâo jhŏng mă bruă ôh. Truh kơ ară anei leh mâo klei mtă hưn êpul bruă djŏ tuôm dưi kiă kriê jih leh klei êđăp ênang snăn gŏ sang ñu lŏ dơ̆ng pŏk ƀăng čhĭ mnia msĕ aguah tlam.

Nguyễn Thị Anh brei thâo, leh klei rŭng răng truh, kyua mâo bruă sang čư̆ êa, dŭm êpul bruă djŏ tuôm răng kriê mnuih ƀuôn sang, snăn gŏ sang ñu lehanăn mnuih ƀuôn sang riêng gah lŏ hơĭt ai tiê wĭt čhĭ mnia msĕ aguah tlam, lŏ nao kơ pưk, kơ hma. Boh nik leh êpul bruă djŏ tuôm tui duah ênŭm leh phung bi rŭng, snăn mnuih ƀuôn sang kăn jăk đei lŏ huĭ rei, ktang hĭn mơh mâo klei jưh knang.

Klei ngă hŏng klei huĭ hyưt êpul mâo phao ktuang ba yua phao ktuang, dhŏng hlăm anôk bruă sang čư̆ êa dua boh să Ea Tiêu lehanăn Ea Ktur ngă leh kơ mnuih ƀuôn sang ti kdriêk Čư̆ Kuiñ ăl čôñ. Khua pô mtô Ae Smit (jing Y Djan Eban, 73 thŭn, dôk ti buôn Kniêt, să Ea Ktur, kdriêk Čư̆ Kuiñ, čar Daklak) lač: "Kâo ƀuh anei jing sa klei ngă amâo mâo djŏ ôh, mơ̆ng điêt hlŏng truh kơ kâo prŏng kâo ka tuôm ƀuh ôh, snăn huĭ êdi”.

Čiăng kơ dŭm boh ƀuôn, alŭ tĭ dua boh să Ea Tiêu, Ea Ktur (kdriêk Čư̆ Kuiñ, čar Daklak) pral lŏ wĭt êđăp ênang, klei hdĭp hơĭt hĭn, dŭm êpul bruă djŏ tuôm mơ̆ng čar, bruă sang čư̆ êa kdriêk, să gak răng hrue mlam, tui duah bi ênŭm phung ngă soh. Mbĭt hŏng anăn, hŏng lu hdră hâo hưn, mđĭ ai mnuih ƀuôn sang, knŏng hlăm 3 hrue leh mâo klei bi rŭng, snăn klei hdĭp ti dŭm boh alŭ ƀuôn dua să anei lŏ wĭt êđăp ênang.

 Nguyễn Kim May, K’iăng khua bruă Đảng, khua să Ea Ktur, kdriêk Čư̆ Kuiñ, čar Daklak brei thâo ară anei, klei hdĭp mnuih ƀuôn sang ti 19 boh alŭ ƀuôn hơĭt leh yap mơ̆ng hrue 12-6.

Čiăng kơ mnuih ƀuôn sang amâo mâo kdjăt kƀla, hơĭt ai tiê duh mkra mnia mblei leh găn klei rŭng răng, să mâo leh klei hâo hưn, mtă mtăn kơ jih jang bruă kđi čar dŭm boh alŭ ƀuôn lehanăn jih jang mnuih ƀuôn sang kơ klei bruă djŏ tuôm ksiêm lehanăn dưi kiă kriê leh jih, mđĭ ai mnuih ƀuôn sang amâo lŏ dôk hlăm klei huĭ hyưt ôh, lehanăn mta kơ jih jang mnuih ƀuôn sang amâo mâo kbiă kơ êngao ôh mmăt mlam tơdah amâo mâo bruă yuôm bhăn, brei dôk nanao hlăm klei thâo răng, lehanăn mtă kơ mnuih ƀuôn sang tơdah ƀuh ya mta klei bi knăl amâo mâo djŏ snăn nao hưn mtam hŏng bruă sang čư̆ êa, amâodah dŭm anôk bruă mâo klei dưi thâo lehanăn mghaih msir bi pral.  

Mbĭt hŏng klei hâo hưn mơ̆ng bruă sang čư̆ êa, snăn ti dŭm anôk bi kƀĭn kkuh mpŭ ăt jih ai tiê bi mtă mtăn mơh, mđĭ ai jih jang mnuih ƀuôn sang, đru mnuih ƀuôn sang lŏ wĭt hlăm klei hdĭp msĕ si aguah tlam. Khua pô mtô Ae Smit lŏ brei thâo, hlăm wưng kơ anăp, hlăm grăp blư̆ bi kƀĭn srăng mâo klei mtă mtăn kơ kơ mnuih ƀuôn sang kreh kriăng nao bi kƀĭn hdĭp jăk đăo djŏ, lehanăn khăp kơ lăn čar. Gĭr bi leh bruă Đảng lehanăn knŭk kna jao, hlue gưt klei mtrŭn, hdră êlan mơ̆ng dŭm gưl bruă sang čư̆ êa alŭ wăl mtă./.