Ti ƀuôn Bu Ndrung, ƀuôn hgŭm Đức An, čar Lâm Đồng, phung ngă mkra dôk mă bruă gĭr bi leh sang mrâo kơ ayŏng Điểu Phạm Dương (djuê ana M’Nông). Hŏng klei thâo mơ̆ng lu thŭn hiu mkra pưk sang, ayŏng Dương “Mblang” kơ sang pô, dưi mkra hluê hŏng klei đru mơ̆ng Phŭn bruă kahan ksiêm lehanăn gŏ sang lŏ đru đa.

 “Sang anei dưi mkra hluê klei mĭn kâo pô čih mkra rup, prŏng 77m2. Ti sang pui lehanăn sang drông tuê mâo pŏk mdhă gang, êdei anei mâo prăk kâo srăng blei tivi dưm tinei. Anôk tŭk knă jing anôk gŏ sang kuh kŭm, mjĕ mjuk. Bi ti tluôn anei, mâo ƀăng bhă, nao phă tač, êdei adih srăng mkra sang tlô nah tluôn anăn”.

Kreh nao ti dŭm hdră msir lăm sang dôk êjai, sang tĭ ƀrôč ti alŭ wăl msĕ si sa čô “Mă bruă ksiêm dlăng”. Khua ƀuôn Điểu Khuy, ƀuôn Bu Ndrung, ƀuôn hgŭm Đức An, brei thâo, mnuih ƀuôn sang tinei bi hgŭm mguôp êdi.

 “Đảng, Knŭk kna mđing đru, mnuih ƀuôn sang hmei mơak lehanăn hơĭt mợh ai tiê. Mnuih ƀuôn sang hlăm ƀuôn Bu Ndrung anei, mâo ya bruă điêt prŏng bi hriê čuă êmuh, mđĭ ai, đru jih ai tiê. Si tô hmô, mdơ̆ng pưk sang, bi đru yơh, mâo ai đru ai, mâo prăk đru prăk.

Ti krĭng kđông kđông kahan krŭ kdơ̆ng să Nâm Nung, lu boh sang tĭ ƀrôč ƀrư̆ dưi bi mlih hŏng dŭm boh sang prŏng siam.Ayŏng Y Kram ti ƀuôn Ja Rah bi mklă “Jih klei hdĭp knŏng ngă sang sa blư̆, mâo Knŭk kna đru kyua anăn gĭr mdơ̆ng bi kjăp.

 “Mkra leh sang, khădah dleh dlan ƀiădah gĭr mdơ̆ng kjăp čiăng rơ̆ng kơ čô anak mâo anôk dôk hơĭt kjăp, kyua sang jing drei dôk truh kơ jih klei hdĭp. Kâo gĭr duah čan thiăm êdei anei lŏ tla wĭt kơ ayŏng adei. Gŏ sang dleh dlan, mâo Knŭk kna đru 60 êklăk prăk, ayŏng adei, mnuih ƀuôn âng bi đru, dưi mâo leh sang siam msĕ snei. Thŭn êgao ênoh kphê đĭ mơh,mkiêt mkriêm dŭm thŭn kơh dưi mdơ̆ng sang msĕ snei.

Bi amai H’ Monh amâo mdăp ôh klei mơak leh dưi dôk hlăm sang mrâo.

 “Mâo leh sang gang angĭn, gang mđiă, kâo mơak êdi lehanăn hơĭt ai tiê mă bruă čiăng duh mkra, pla mjing, rông ba anak aneh nao sang hră. Kâo srăng gĭr mă bruă čiăng mkiêt mkriêm prăk, dŭm thŭn ti anăp lŏ tla wĭt kơ ayŏng adei, amĭ ama đru kơ kâo dưi mâo sang dôk kjăp msĕ ară anei.

 Amâo kbưi ôh mơ̆ng anăn, gŏ sang kahan hđăp Y Choi dôk mkŏ mjing klei huă čhưn đĭ dôk sang mrâo hŏng klei mơak, trei mđao. Hlăm sang mrâo giăm êa Nâm Nung êđăp drưm, kahan hđăp Y Choi brei thâo klei mơak.

Êlâo kơ mdơ̆ng sang anei, kâo dôk hlăm sang tĭ ƀrôč mdơ̆ng hlăk thŭn 1989 leh. Mâo Knŭk kna đru mdơ̆ng sang lehanăn kâo lŏ čan prăk ti knơ̆ng prăk đru ba yang ƀuôn, kyua anăn kâo dưi mâo sang kjăp msĕ snei.Gŏ sang kâo mơak lehanăn lačjăk êdi kơ Đảng, Knŭk kna.

Thŭn 2025, krĭng knông lăn čar Lâm Đồng (Dak Nông êlâo adih) đru msir lăm leh sang dôk êjai, sang tĭ ƀrôč kơ 1.755 gŏ sang. Phŭn bruă kahan ksiêm ăt đru kơ čar prăk mdơ̆ng 500 boh sang kơ mnuih ƀuôn sang. Mơ̆ng boh sĭt pŏk ngă, H’ Thương – ti să Nâm Nung, čar Lâm Đồng brei thâo:

"Kâo ƀuh mơ̆ng Gưl dlông truh kơ ƀuôn hgŭm, Hdră msir lăm sang dôk êjai, sang tĭ ƀrôč tŭ dưn êdi. Tinei, hmei ksiêm dlăng, mtrŭt mđĭ djŏ wưng, djŏ klei kčah mtrŭn. Khua knŭk kna ƀuh klă mnuih ƀuôn sang dôk kƀah sang dôk snăn brei ngă mtam. Ară anei truh yan hjan, mđing uêñ êdi kơ mnuih ƀuôn sang, Khua knŭk kna gĭt gai brei ngă djŏ wưng, čiăng mnuih ƀuôn sang dưi mâo sang dôk kjăp.

Mơ̆ng dŭm hdră êlan mtrŭn djŏ klă lehanăn klei hgŭm kngan mơ̆ng jih anôk bruă kđi čar, dŭm boh sang prŏng siam dưi bi mlih kơ dŭm boh sang tĭ ƀrôč, amâo kjăp, ba klei mơak, klei čang hmăng kơ sa klei hdĭp hơĭt kjăp, trei mđao kơ dŭm êbâo gŏ sang ti Lâm Đồng. Ai tiê hgŭm mguôp, klei thâo bi đru mơ̆ng êpul êya dưi guh mngač mơ̆ng grăp hdră sang dôk, đru lar bra klei khăp čiăng, mñă klăklei đăo knang mơ̆ng mnuih ƀuôn sang hŏng Đảng lehanăn Knŭk kna. “Klei mơak mơ̆ng mnuih dưi dôk hlăm sang dôk” hlăk lar bra ti dŭm ƀuôn sang./.