Mrâo êgao, Êpul hgŭm phung djŏ drao ruă diosin čar Kon Tum bi mguôp hŏng knơ̆ng bruă mnia mblei čar Kon Tum ngă bruă mđup brei giăm 400 hnư mnơ̆ng tết mâo ênoh êbeh 146 êklăk prăk kơ phung amâo mâo jơ̆ng kngan jing phung djŏ drao ruă diosin ênuk tal 3 ti dŭm kdriêk: Đăk Hà, Kon Braih, Ngọc Hồi leh anăn ƀuôn prŏng Kon Tum. Mbĭt hŏng Êpul hgŭm phung djŏ drao ruă diosin čar Kon Tum ăt kah sa kdrêč hlăm Keh prăk đu kơ phug djŏ drao ruă diosin êbeh 137 êklăk prăk mđup brei kơ 846 čô djŏ drao ruă ti alŭ wăl čar.

Êlâo kơnăn, Công đoàn dŭm anôk bruă tuh tia – Anôk bruă duh mkra čar Kon Tum bi mguôp hŏng Công đoàn phung mă bruă knŭk kna mkŏ mjing Hdră Tết bi hgŭm – yan mnga bi mguôp thŭn 2022. Hlăm hdră, 360 čô đoàn viên công đoàn, mnuih mă bruă mâo klei hdĭp dleh dlan dưi mâo hnư mnơ̆ng mâo ênoh mơ̆ng 500 êbâo prăk truh kơ 1 êklăk prăk. Êngao kơnăn Công đoàn dŭm anôk bruă tuh tia – Anôk bruă duh mkra čar Kon Tum ăt mđup brei 200 hnư mnơ̆ng kơ phung đoàn viên công đoàn leh anăn mnuih mă bruă. Ayŏng Trần Duy Hưng, mă bruă ti Knơ̆ng bruă duh bi liê mđĭ kyar bruă mkŏ mkra Anôk bruă duh mkra čar Kon Tum mâo 2 čô anak mâo klei ruă, klei hdĭp gŏ sang dleh dlan brei thâo:

“Thŭn 2022 anôk bruă mkŏ mjing klei găl kluôm ênŭm kơ mnuih mă bruă. Kâo lač jăk kơ dŭm êpul êya, boh nik jing êpul bruă công đoàn mâo leh klei uêñ mĭn kơ mnuih mă bruă mâo klei hdĭp dleh dlan. Gŏ sang kâo mâo 2 čĕ ruă duam ăt dưi mkŏ mjing sa wưng tết msĕ hŏng arăng, ăt bi hgŭm leh anăn mđao mơh”.

            Hluê ngă dŭm bruă ngă jăk wưng yan mnga Quý Mão thŭn 2023, phung mda asei čar Dak Lak mâo leh lu hdră ngă bruă mrâo, mđing truh kơ lu phung mdê mdê hlăm dŭm alŭ wăl. Djă pŏk hră blei mnơ̆ng mâo ênoh 500 êbâo prăk, amai H’No Kƀuôr, ti ƀuôn Kmrơ̆ng Prŏng A, să Ea Tu, ƀuôn prŏng Ƀuôn Ama Thuôt mđing hmư̆ phung mă bruă hưn mdah kơ dŭm mta mnơ̆ng dhơ̆ng mâo hlăm “Siêu thị mini” čiăng ruah mă dŭm mta mnơ̆ng yua mjêč. Amai brei thâo:

“Mâo klei uêñ mĭn mơ̆ng khua gĭt gai Êpul hgŭm phung bum ală ăt msĕ hŏng phung mâo ai tiê kmah, hlăm wưng tết hriê ăt msĕ hŏng mâo êpul ngă bruă đru dŏng, hmei mâo dŭm hnư mnơ̆ng mơ̆ng grăp čô brei kơ hmei. Kâo ƀuh hdră anei mâo boh tŭ dưn yuôm bhăn, h’uh mđao êdi, ñu đru kâo leh anăn phung hgŭm mkăn, sa kdrêč čiăng mđĭ ai leh anăn jing klei hơ̆k mơak kơ pô”.

            Hŏng grăp pŏk hră blei mnơ̆ng mâo ênoh 500 êbâo prăk, pô mâo hnư mnơ̆ng srăng ruah mă dŭm mta mnơ̆ng mâo hlăm sang mnia mblei msĕ si: Sĭk, êa ksâo êmô, briah, boh mnŭ, ƀung krô, mnơ̆ng bi mmăt…Thŭn anei, hdră ăt mđup brei 700 pŏk hră blei mnơ̆ng kơ mnuih ƀun ƀin ti ƀuôn prŏng Ƀuôn Ama Thuôt leh anăn wăl kreh Ƀuôn Hồ.

         Amai H’Giang Niê Khua bruă hđeh êdam êra čar Dak Lak brei thâo, mbĭt hŏng “Siêu thị mini Tết 0 prăk”, hlăm wưng anei, jih jang 22 êpul êya nah gŭ bruă hđeh êdam êra hlăm čar mâo sơăi bruă ngă mđing truh kơ mnuih ƀun ƀin, mta kñăm msĕ si: mkă dlăng, mdrao klei ruă, mbha êa drao amâo mâo mă prăk, mđup brei mnơ̆ng yua, rŭ mdơ̆ng sang klei khăp, êdeh wai jơ̆ng, klei đru hriăm hră mơar… Anei jing bruă ngă tŭ dưn đru mguôp hŏng alŭ wăl đru kơ mnuih ƀun ƀin mâo klei găl mơak yan mnga, drông tết.

“Hmei uêñ mĭn tal êlâo jing mnuih mă bruă, mnuih ƀun ƀin leh anăn boh nik jing phung hđeh mâo klei hdĭp dleh dlan. Leh anăn thŭn anei hmei ăt bi klă thiăm kơ sa êpul mrâo jing phung lĭng kahan mrâo wĭt ti alŭ wăl. Bi hŏng phung anei, hmei hmăng hmưi ngă jăk bruă đru kơ phung lĭng kahan dôk ngă bruă. Leh anăn hŏng phung leh wĭt hlăm alŭ wăl ăt mâo dŭm klei đru, si srăng ngă čiăng kơ bruă kđi čar leh anăn jih jang dŭm gưl bruă, êpul bruă leh anăn dŭm gưl bruă Đảng nah gŭ uêñ mĭn, mđĭ ai čiăng kơ thŭn 2023 lŏ dơ̆ng gĭr ktưn hlăm klei mđĭ kyar bruă duh mkra ăt msĕ hŏng nao hgŭm hlăm dŭm mta bruă đoàn bruă êpul hlăm alŭ wăl.”

Êpul hgŭm mnuih mă bruă čar Dak Lak mkŏ mjing leh hdră “Tết bi hgŭm” thŭn 2023 hŏng akŏ “Tết bi hgŭm – Yan mnga bi mguôp”. Hluê anăn, dưi bi êdah klei khăp, klei uêñ mĭng mơ̆ng êpul bruă công đoàn hŏng phung đoàn viên, mnuih mă bruă mâo klei hdĭp dleh dlan, phung ruă duam, mâo klei truh êjai mă bruă… kñăm đru gui klei dleh dlan, đru kơ mnuih mă bruă drông Tết Nguyên đán Quý Mão 2023 h’uh mđao, bi hgŭm. Hlăm hdră, phung đoàn viên, mnuih mă bruă dưi ktuê dlăng dŭm klei kdŏ mmuñ hŏng akŏ Mơak Đảng, mơak Yan mnga, mjĕ êrô… Wưng anei, Êpul hgŭm mnuih mă bruă čar Dak Lak mđup brei 5 boh sang công đoàn (50 êklăk prăk sa boh) kơ dŭm gŏ sang dleh dlan amâo mâo sang dôk leh anăn mđup brei 500 hnư mnơ̆ng kơ phung đoàn viên, mnuih mă bruă.