Dŭm hruê giăm Tết, să Trường Sơn, kdriêk Quảng Ninh, čar Quảng Bình mâo klei mơak mñai êdi. Lĭng kahan răng mgang knông lăn Làng Mô ti kdriêk kdriêk Quảng Ninh mkŏ mjing bruă đŭng điŏ mđup brei kơ mnuih ƀuôn sang ƀuôn Ploang, să Trường Sơn, kdriêk Quảng Ninh. Mnuih ƀuôn sang mbĭt hŏng phung lĭng kahan mkŏ mjing kdŏ mmuñ, klei hlăp lêñ knhuah gru, ngă kơ ai êwa hlăm wưng tết jing h’up mđao leh anăn hơ̆k mơak hĭn.

Wưng anei, Lĭng kahan răng mgang knông lăn Làng Mô mbĭt hŏng dŭm anôk bruă mđup brei hnư mnơ̆ng tết kơ mnuih ƀuôn sang ƀuôn Ploang leh anăn ƀuôn Rìn Rìn, mđup brei kơ phung hđeh sang hră ao mđao, mđup brei 5 sang tlô kyua yang ƀuôn, khăt ƀŭk amâo mâo mă bruă leh anăn ngă bruă mkă dlăng klei ruă, mbha êa drao amâo mâo mă prăk, mbha mŭng kơ mnuih ƀuôn sang krĭng knông lăn. Hồ Văn Thông, ti ƀuôn Ploang, să Trường Sơn, kdriêk Quảng Ninh hơ̆k mơak brei thâo: “Yan mnga krĭng knông lăn – h’uh mđao mnuih ƀuôn sang” jing jăk leh anăn mơak êdi, mnuih ƀuôn sang mơak mñai. Hlăm klei hdĭp kâo, thŭn anei dưi nao hlăm hdră msĕ sơnei plah wah lĭng kahan hŏng mnuih ƀuôn sang. Dŭm mta bruă mơ̆ng klei kdŏ mmuñ, mnuih ƀuôn sang kdŏ, mmuñ, dưi blŭ hrăm leh anăn mâo hnư mnơ̆ng jing mơak êdi, grăp čô mâo hnư mnơ̆ng sơăi”.

Sa yan mnga mrâo lŏ truh hŏng krĭng čư̆ čhiăng knông lăn Dân Hoá, kdriêk Minh Hóa, čar Quảng Bình. Phung knuă druh, lĭng kahan kđông kahan ƀăng jang knông lăn Cha Lo mbĭt hŏng dŭm anôk bruă lĭng kahan hlăm alŭ wăl hluê ngă hdră “Yan mnga krĭng knông lăn – h’uh mđao mnuih ƀuôn sang” hmao đru hlăm wưng tết kơ mnuih ƀuôn sang ƀun ƀin ti gŭ jơ̆ng čư̆ Giăng Màn. Hlăm hdră mâo lu mta bruă yuôm bhăn msĕ si čuh brui mgưi bi hdơr kơ phung jhŏng ktang djiê êngiă, mkŏ mjing klei kdŏ mmuñ, bi lông đŭng điŏ mtah, mđup brei hnư mnơ̆ng kơ dŭ gŏ sang. Aduôn Đinh Thị Mùi, ti ƀuôn Bãi Dinh, să Dân Hoá, kdriêk Minh Hóa brei thâo: “Hdră Yan mnga krĭng knông lăn – h’uh mđao mnuih ƀuôn sang, mnuih ƀuôn sang hmei mâo klei mơak mñai êdi. Kyua hmei jing dŭm gŏ sang ƀun ƀin ti să knông lăn, krĭng taih kbưi ară anei mâo klei đru. Ti anăp, hmei srăng gĭr ktưn čoh bruă ngă hma, mđĭ kyar klei hdĭp mda, amâo lŏ guôn knang ôh kơ knŭk kna leh anăn dŭm phŭn, dhar bruă”.

Hdră Yan mnga krĭng knông lăn – h’uh mđao mnuih ƀuôn sang dưi mkŏ mjing grăp thŭn êlâo kơ Tết Nguyên Đán leh anăn hrăm mbĭt ti jih jang să knông lăn, mkŏ mjing sa ai êwa drông yan mnga mơak mñai ti dŭm ƀuôn êlan. Hŏng hdră anei, mnuih ƀuôn sang, knuă druh, lĭng kahan krĭng knông lăn hrăm mbĭt bi êdah klei bi mguôp, klei mĭn găn klei dleh dlan leh anăn hmăng hmưi mâo lu boh tŭ dưn hlăm thŭn mrâo 2023.

Đại tá Trịnh Thanh Bình, Khua gĭt gai lĭng kahan knông lăn Quảng Bình brei thâo, êlâo kơ Tết Nguyên Đán, lĭng kahan knông lăn gĭt gai leh anăn iêo mthưr dŭm êpul êya, grăp čô bi mkrum mguôp čiăng mâo dŭm êbâo hnư mnơ̆ng, sa kdrêč đru kơ mnuih ƀuôn sang krĭng knông lăn Quảng Bình drông sa yan mnga mơak mñai, trei mđao. “Hlăm hdră mâo lu mta bruă klă klơ̆ng leh anăn mđup brei lu hnư mnơ̆ng mơ̆ng phung mâo ai tiê kmah čiăng kơ mnuih ƀuôn sang mâo klei hdĭp trei mđao hĭn. Mkŏ mjing klei găl kơ mnuih ƀuôn sang, lĭng kahan ti alŭ wăl knông lăn drông sa wưng tết trei mđao, yâo mơak, jing boh kdrŭt čiăng mđĭ kyar bruă duh mkra ala ƀuôn nao mbĭt hŏng bruă răng mgang knông lăn ala čar.

Êlâo kơnăn, ti să Hồng Vân, kdriêk A Lưới, čar Thừa Thiên Huế, knơ̆ng gĭt gai lĭng kahan knông lăn, Êpul hgŭm bruă phung mniê gưl dlông Việt Nam bi mguôp hŏng bruă Đảng čar, bruă sang čư êa čar Thừa Thiên Huế mkŏ mjing hdră “Yan mnga knông lăn, h’uh mđao mnuih ƀuôn sang” tŭ drông Tết Nguyên đán Quý Mão 2023. Tinei mkŏ mjing leh dŭm mta bruă msĕ si: ba yua, jao sang klei khăp kơ mnuih ƀun ƀin krĭng knông lăn, nao čuă, mđup brei hnư mnơ̆ng kơ mnuih ƀun ƀin, gŏ sang mâo bruă tŭ dưn, nao čuă, hơêč hmưi tết kơ bruă sang čư êa, mnuih ƀuôn sang, hđeh sang hră, êpul kriê dlăng, răng mgang knông lăn, mđup brei hnư mnơ̆ng kơ hđeh sang hră leh anăn gŏ sang dleh dlan ti kdriêk A Lưới, mkă dlăng klei ruă, mbha êa drao amâo mâo mă prăk kơ mnuih ƀuôn sang, dŭm mta bruă dhar kreh, mjuăt ktang asei mlei, klei hlăp lêñ. Hdră ăt mđup brei 10 boh sang kơ mnuih ƀun ƀin krĭng knông lăn, 15 drei êmô mjeh, 500 hnư mnơ̆ng tết.