Mbĭt hŏng phung knuă druh hlăm Êpul khua kiă kriê lĭng kahan ƀuôn prŏng Sơn La nao čuă gŏ sang adei Chiêu Thanh Trúc, djuê ana Thái, hđeh hriăm hră adŭ   5 ti ƀuôn Nà Ngùa, hlăm êpul anôk dôk mrô 2, ƀuôn hgŭm Chiềng An, ƀuôn prŏng   Sơn La, čar Sơn La. Gŏ sang Trúc jing gŏ sang ƀun ƀin, amĭ ama amâo mâo bruă knuă mă hơĭt kjăp ôh. Lehanăn lĕ, ama Trúc lŏ mâo klei ruă kjham, kreh jêñ jêñ nao kơ sang êa drao, snăn gŏ sang knư̆ hĭn mơh lĕ hlăm klei dleh dlan.

Thâo kơ klei hdĭp Trúc msĕ snăn, bruă Đảng, Anôk kiă kriê bruă kahan ƀuôn prŏng Sơn La nao bi tuôm lehanăn mđĭ ai gơ̆, lehanăn bi tuôm hŏng hŏng êpul khua kiă kriê sang hră Gưl sa Lò Văn Giá - anôk Trúc hlăk dôk hriăm čiăng đru ba kơ gơ̆ mâo klei găl hriăm hră mơar.

Lŏ tla wĭt ai tiê duh mĭn, đru ba mơ̆ng amĭ ama, phung nai mtô lehanăn jih jang phung knuă druh lĭng kahan mơ̆ng Anôk bruă kiă kriê kahan ƀuôn prŏng, dŭm thŭn êgao, Trúc jing nanao hđeh hriăm hră thâo. Amuôn Chiêu Thanh Trúc lač: “Mâo klei đru mơ̆ng di amiêt lĭng kahan, kâo ƀuh mơak snăk, lehanăn mâo đru mdul brei leh kơ amĭ ama, snăn kâo gĭr jih ai tiê hriăm hră mơar, čiăng bi mâo boh tŭ dưn jăk, amâo mâo bi ênguôt amĭ ama, lĭng kahan lehanăn wăt phung nai mtô ti sang hră ôh”.

Pŏk ngă hdră “Đru adei nao sang hră mơar”, truh kơ ară anei, Anôk bruă kiă kriê lĭng kahan ƀuôn prŏng Sơn La mâo đru ba brei leh kơ 5 čô hđeh hriăm hră mâo klei hdĭp dleh dlan ti sang hră gưl sa Lò Văn Giá, ƀuôn prŏng Sơn La hŏng ênoh đru jing 250 êbâo prăk/mlan/čô hđeh hlăm 5 thŭn mtam. Êngao anăn, lŏ dơ̆ng đru kơ mnơ̆ng mnuă hriăm hră mơar grăp blư̆ phung hđeh čhuang mŭt thŭn hriăm mrâo.

Trung tá Khuất Minh Tuấn, k’iăng khua bruă kđi čar, ti Anôk kiă kriê bruă lĭng kahan ƀuôn prŏng Sơn La brei thâo: Hŏng ênoh prăk đru jing amâo mâo prŏng ôh, ƀiădah anei jing mnơ̆ng mđup brei mơ̆ng jih jang phung knuă druh, lĭng kahan, hŏng klei čang hmăng dưu đru kơ adei dôk hlăm klei dleh dlan nao sang hră mơar, čiăng dưi mâo klei thâo săng, anăp jing mnuih tŭ dưn kơ ƀuôn sang lehanăn lăn čar: “Hlăm wưng kơ anăp, bruă Đảng, Anôk bruă kia kriê lĭng kahan ƀuôn prŏng lŏ dơ̆ng ngă jăk hĭn dŭm hdră êlan mơ̆ng Đảng, knŭk kna, mâo hdră êlan mă bruă klă mngač mtam,čiăng kợih jang djăp êpul êya mơ̆ng phung khua kiă kriê truh kơ lĭng kahan ƀuh kơ mta kñăm, bruă klam mâo jih jang knuă druh lĭng kahan hlue ngă, lehanăn mâo klei bi mguôp kjăp hŏng dŭm anôk bruă Đảng, bruă sang čư̆ êa alŭ wăl bi ksiêm yap truh hŏng grăp čô phung hđeh dôk hlăm klei dleh dlan,lŏ dơ̆ng mđĭ ai lehanăn đru digơ̆ nao sang hră mơar”.

Mơ̆ng klei đru ba phung hđeh hriămhră dleh dlan nao sang hră mơar, anôk bruă kiă kriê lĭng kahan ƀuôn prŏng, lu êpul êya lĭng kahan, lehanăn djăp êpul bruă lehanăn phung thâo bi đru hlăm ƀuôn prŏng Sơn La ăt hrăm mbĭt bi đru ba, phung hđeh nao sang hră mơar, msĕ si hla hmum đŭng hruôm hla tĭ. Truh kơ ară anei mâo leh êbeh 110 čô hđeh hriăm hră dôk hlăm klei dleh dlan ti alŭ wăl mâo đru ba. Hà Trung Chiến, Khua bruă Đảng ƀuôn prŏng Sơn La brei thâo: Mơ̆ng klei ba anăp hlăm djăp mta kơ kle ihdĭp, boh nik kơ klei hdĭp mda ala ƀuôn, snăn grăp čô knuă druh, lĭng kahan mơ̆ng anôk bruă kiă kriê kahan ƀuôn prŏng Sơn La mâo ngă leh, lehanăn hlăk lŏ dơ̆ng ngă nanao bruă klam pô hŏng klei hdĭp mda ala ƀuôn, bi năng hŏng klei phung ƀuôn sang djăp djuê ana ƀuôn prŏng Sơn La đăo knang: “Êpul khua kiă kriê bruă Đảng ƀuôn prŏng bi myuôm klei mĭn mâo ruah leh kơ hdră mă bruă mơ̆ng Anôk kă kriê bruă lĭng kahan ƀuôn prŏng ngă, đru leh kơ phung hđeh hriăm hră dôk hlăm klei dleh dlan, mâo klei găl hĭng dưi nao sang hră mơar,mjing djăp klei găl kơ klei mđĭ kyar klei hdĭp mda, hơĭt ai tiê nao sang hră, lehanăn lŏ bi êdah klei khăp prŏng, lar bra wăt hlăm bruă kđi čar,čiăng kơ jih jang dŭm anôk bruă, êpul êya mkăn hrăm mbĭt bi tui ngă, čiăng kơ jih jang bruă hlăm klei hdĭp mda ala ƀuôn ti alŭ wăl mâo klei jăk hĭn”.

 “Jih jang mđrăm mbĭt hlue ngă bruă đru čung ba hlăm yang ƀuôn lehanăn atăt adei nao sang hră mơar” amâo mâo djŏ knŏng jing bruă ngă mă knŏng bhiâo, ƀiădah hlŏng jing bruă ngă nanao, mâo hdră mă bruă klă mngač ti Anôk kiă kriê lĭng kahan ƀuôn prŏng Sơn La, lo dơ̆ng ktur bi msiam hĭn knhuah jing lĭng kahan Awa Hô.

Anei ăt jing knơ̆ng kjăp pioh kơ anôk bruă kiă kriê lĭng kahan ƀuôn prŏng ktưn mkŏ mjing êpul lĭng kahan đru čung ba phung ƀuôn sang hŏng klei jăk, lŏ dơ̆ng bi kjăp klei bi mguôp hŏng phung ƀuôn sang, sa ai hĭn hrăm mbĭt bi leh bruă čuăn kđi čar, mđĭ hnơ̆ng kjăp bruă lĭng kahan răng mgang ala čar, bruă lĭng kahan alŭ wăl: Đru bi rŭ mdơ̆ng ƀuôn prŏng Sơn La đĭ kyar mtah, pral, kjăp, ênhuk mrâo, kreh dhar./.