Ƀri wưng Tết Nguyên đán Quý Mão, Êpul hgŭm gru bi kal hrah čar Dak Nông bi mguôp hŏng phung thâo bi đru mđup brei 1.000 hnư mnơ̆ng kơ phung dôk hlăm klei dleh dlan ti dua kdriêk jing Dak Glong lehanăn Krông Knô. Grăp hnư mnơ̆ng 500 êbâo prăk, mâo ai tiê klei khăp truh hŏng jih jang mnuih, čiăng kơ grăp boh sang mâo tết sơăi.

Lehanăn 5 kdriêk hlăm čar mkŏ mjing anôk rang mdah mnơ̆ng dhơ̆ng čhĭ mnia amâo mâo liê prăk ôh mđup brei kơ dŭm gŏ êsei dleh dlan. Êpul mkŏ mjing mbha 1000 pŏk hră (hŏng ênoh 600.000 prăk/pŏk hră) čiăng kơ mnuih ƀuôn sang nao ruah ya mta mnơ̆ng pô čiăng. Êpul hgŭm mnuih ngă bruă Daknông mkŏ mjing hdră Tết kuh kŭm h’uh mđao yan mnga kơ mnuih ngă bruă dôk hlăm klei dleh dlan hŏng ênoh jih jang 180 êklăk prăk, đru kơ mnuih ngă bruă mâo klei găl ƀơ̆ng tết./.