Klei anei brei ƀuh bruă mlih mrô ti krĭng mnuih djuê ƀiă, čư̆ chiăng, boh nik ti krĭng taih kbưi, krĭng dleh dlan ăt jing sa klei lông dlăng prŏng.

Ti anôk bruă sa ƀăng bhă mơ̆ng knơ̆ng bruă sang čư êa să Ea tul, kdriêk Čư M’Gar, čar Dak Lak, mnuih ƀuôn sang nao ngă dŭm mta hră mơar knŭk kna mâo lu êdi. Knuă druh mtô kơ mnuih ƀuôn sang bi leh hră mơar êjai, mŭt klei čih hlăm kdrăp điện tử êjai. Hluê si ayŏng Y-Să Mlô, knuă druh adŭ bruă tĭng mkă să Ea Tul, 98% mnuih ƀuôn sang hlăm să jing mnuih djuê ƀiă, bruă hưn mthâo mrâo mrang ka đei mâo lu. Hĭn kơnăn, mtô klă anăp kơ mnuih ƀuôn sang mâo klei hơĭt:

 Mnuih ƀuôn sang amâo mâo klei čiăng. Lu jing hriê ngă hră mơar tinei. Hnơ̆ng tal 3 sitôhmô bi klă hră k’kiêng, bi klă bi dôk ung mô̆. Hnơ̆ng tal 4 ka dưi ka ôh kyua mnuih ƀuôn sang ka dưi nao jĕ hŏng klei hưn mthâo mrâo mrang.

 Amai H’Zin, ti ƀuôn Sah B, să Ea Tul ăt tuôm lông bi klă leh hlăm mbah bruă knŭk kna online, ƀiădah, ti tluôn lŏ mâo dŭm klei mtŭk mtŭl, leh anăn kơnăn amai amâo lŏ đei khăp ôh êjai hluê ngă dŭm hră mơar điện tử:

Jăk hĭn pô nao ti anôk bruă êmuh klă anăp. Pô ngă hlăm kdrăp điện tử, mâo đa đa photo, mă rup soh. Êlâo dih kâo nao ngă hră kak asei ti mbah knŭk kna ăt mâo klei soh, yuôl tinăn mơh. Si thâo lŏ bĭt mjing, ăt lŏ nao ngă klă anăp mơh.

Lê Quang Bất, Khua bruă sang čư êa să Ea Tul lač klă dŭm klei dleh dlan êjai ngă bruă mlih mrô ti alŭ wăl

       Digơ̆ đa đa boh hră kăn thâo si thâo mloh mrô hĕ. Wăt kơ boh hră mơ̆ng mnuih djuê ƀiă mkăn. Drei thâo yua hlăm computer ƀiădah hlăm đĭng blŭ thâo mĭn amâo mâo, kyuanăn dleh kơ boh klei anei.

Mnuih ƀuôn sang čiăng nao truh ti anôk bruă čiăng mâo klei mtô klă, hrô kơ hluê ngă dŭm hră mơar hlăm mbah online ăt jing sa klei sĭt ti kdriêk Tri Ôn, čar An Giang. Đỗ Minh Trí, k’iăng khua bruă sang čư êa kdriêk Tri Tôn ăt tŭ yap: Mlih mrô ti krĭng čư̆ čhiăng, krĭng mnuih djuê ƀiă jing klei amâo mâo ênưih ôh:

Mnuih ƀuôn sang ti nei lu jing mnuih djuê ƀiă, kyuanăn ngă hră mơar hŏng đĭng blŭ jing knŏng ƀiă. Dôk lu hriê ti nei. Hmei ăt mtô kơ mnuih ƀuôn sang ngă hră mơar hŏng đĭng blŭ thâo mĭn, ƀiădah ăt kăn tŭ dưn lei.

 Amâo djŏ knŏng dleh dlan hlăm klei hâo hưn, čih hlăm mbah bruă knŭk kna online, bi hŏng mnuih ƀuôn sang krĭng čư̆ čhiăng, si srăng ngă čiăng tla prăk online ăt jing sa boh klei dleh. Ti dŭm krĭng taih kbưi, mnuih ƀuôn sang amâo mâo hră knơ̆ng prăk, kăn thâo leh dŭm knơ̆ng prăk điện tử. Diñu ăt dôk mưng yua prăk mơar čong pô ngă dŭm mta hră mơar kơh mâo klei hơĭt. Lý Văn Lâm, k’iăng khua bruă sang čư êa wăl krah Lăng Can, kdriêk Lâm Bình, čar Tuyên Quang lač klă dŭm klei dleh dlan kpăk gun:

      Boh klei dleh hĭn ară anei jing mnuih ƀuôn sang, phung srăng ngă dŭm bruă anei. Lu mnuih ƀuôn sang amâo mâo thâo yua computer amâodah đĭng blŭ thâo mĭn. Khădah mâo phung knuă druh mtô lač, ƀiădah mnuih ƀuôn sang ba yua ăt dleh dlan êdi.

       Ma Đình Quan, k’iăng khua bruă sang čư êa să Hồng Quang, kdriêk Lâm Bình, čar Tuyên Quang lač kơ boh sĭt klei anei:

Êjai ngă bruă mlih mrô, boh nik jing bruă knŭk kna online, klei dleh dlan tal êlâo jing klei thâo săng mnuih ƀuôn sang. Tal 2 jing hnơ̆ng gŏ sang ƀun ƀin lu, gŏ sang yua đĭng blŭ thâo mĭn kơ bruă mghaih msir hră mơar knŭk kna ka đei lu ôh. Dleh dlan ară anei hmei ka mâo hdră êlan klă klơ̆ng.

Ară anei, hnơ̆ng yua bruă knŭk kna online ti hnơ̆ng 3, 4, 80-90% knơ̆ng mâo mă ti dŭm ƀuôn prŏng. Hŏng dŭm alŭ wăl krĭng čư̆ čhiăng, krĭng taih kbưi, ênoh anei knŏng mâo mă 30-40%. Kyuanăn, mta knăm mlih mrô truh kơ grăp gŏ sang, grăp čô mnuih ƀuôn sang ăt dleh dlan êdi.