Sa čô hđeh Cơ Tu Clâu Ân ti să Tr’hy, kdriêk Tây Giang, čar Quảng Nam êrĭt amĭ ama mơ̆ng điêt. Hlăm sang 3 čô ayŏng adei, Ân jing anak tal 2 hlăm gŏ sang. Jih jang djăp mta bruă jing jưh knang ti mra aduôn êgao 70 duh mĭn duah ƀơ̆ng. Êsei huă djăp ƀơ̆ng knŏng êsei mjai hŏng hla djam dliê, bi tơdah aduôn djiu djuam duam ruă, amâo mâo pô nao kơ hma snăn kplŭt aguah kƀah tlam. Pap kơ klei hdĭp dŭm aduôn čô digơ̆, phung riêng gah đa mguôp braih, đa mguôp hra, mâo djam mtam nao bi đru ba. Bi klei hriăm hră kơ An jing sa mta klei amâo mâo djŏ ênưih ôh.

Thŭn 2020, Kđông kahan răng mgang knông lăn A Xan nao mă bruă hŏng găp djuê, hŏng bruă sang čư̆ êa čiăng tŭ jum Ân jing anak rông. Wĭt hdĭp hŏng phung lĭng kahan răng mgang knông lăn, Clâu Ân mâo mkăp sa boh adŭ pĭt, mâo anôk hriăm hră mơar jăk, lehanăn jih jang mnơ̆ng yua hlăm klei hdĭp... Clâu Ân mâo ama rông jing phung kahan răng mgang knông lăn bŏ hŏng klei khăp, duh mĭn dơ̆ng mơ̆ng klei huă ƀơ̆ng, klei pĭt đih, lehanăn hriăm hră mơar. Ân hlăk dôk hriăm adŭ 8 sang hră knŭk kna čiêm rông hđeh mnuih djuê ƀiă, sang hră gưl 2 Lý Tự Trọng. Ân lač:

“Klei hdĭp hmei bŏ hŏng klei dleh dlan, mâo lĭng kahan răng mgang knông lăn rông ba snăn ƀuh mơak snăk. Mâo lĭng kahan mđing uêñ dơ̆ng mơ̆ng klei huă ƀơ̆ng, lehanăn hriăm hră mơar jing msĕ si sa gŏ sang mrâo. Kâo lač jăk kơ lĭng kahan răng mgang knông lăn lu snăk. Tinei kâo mâo huă ƀơ̆ng djăp ênŭm, mâo čhum čŭt ao hơô siam, kahan răng mgang knông lăn mtô brei hriăm hră mơar”.

        Amâo mâo pral kdal jhŏng kmlăn msĕ hŏng Clâu Ân, Hốih Đức Hữu dôk hêñ mlâo ñŭt huĭ. Gŏ sang gơ̆ lĕ hlăm klei dleh dlan mơh. Ama Hữu ruă boh ƀleh nao mdrao nanao mơ̆ng lu thŭn hŏng anei leh. Klei huă ƀơ̆ng, klei čŭt hơô knŏng jưh knang kơ amĭ sơăi duah. Thŭn 2019, Hữu mâo kahan răng mgang knông lăn kđông A Xan tŭ jum rông ba. Hlăm dŭm hrue tal êlâo wĭt dôk hŏng kđông, Hốih Đức Hữu êwang êweh, djiu djuam, lehanăn kreh ênguôt kơ sang akâo čiăng wĭt.

Mâo knuă druh lĭng kahan, jhĕ giăm mđĭ ai bi juh, ƀrư̆ ƀrư̆ kơ amuôn pral ñu kma hŏng klei hdĭp hlăm kđông. Leh wĭt hdĭp hlăm kđông mâo kahan răng mgang knông lăn yap digơ̆ jing msĕ si mnuih hlăm sa boh sang. Dua čô amuôn jing kahan điêt knŏng hriăm hră mơar, pĭt đih, mâo klei mkă tĭng mmông djŏ msĕ si lĭng kahan êdi mơh, bi hriăm mơ̆ng điêt hlăm bruă thâo piăt êmiêt, bi thâo bi mdoh, klăp añuê abăn bi khuăt.

Kđông kahăn răng mgang knông lăn A Xan ară anei tŭ jum rông ba 2 čô amuôn, lehanăn đru kơ 7 čô dôk hlăm klei dleh dlan ăt dôk hdĭp hŏng găp djuê. Thiếu Tá Nguyễn Văn Lợi, pô ngă bruă kđi čar kđông A Xan, kdriêk Tây Giang brei thâo:    

“Hŏng phung amuôn adei jing anak rông mơ̆ng kđông, hmei dôk rông ba mâo dua čô ti kđông jing phung dôk hlăm klei hdĭp dlan dlan hĭn êdi, hmei iêo rông ba kơ kđông anei čiăng ênưih mjuăt bi hriăm čung ba  bi jăk hĭn. Phung hđeh pral mơh ñu kma hŏng klei hdĭp hlăm kđông, lehanăn hriăm hră mơar tŭ hĭn mơh. Mơ̆ng hdră anei dưi mâo pŏk bi lar, mâo prăk bi liê mơ̆ng nah dlông lehanăn mơ̆ng phung lĭng kahan đru grăp mlan truh 600.000 prăk/čô.”

 Dŭm boh kđông kahan răng mgang knông lăn hlăm čar Quảng Nam hlăk dôk rông ba truh 18 čô hđeh hlue hŏng hdră “Yap jing anak rông kơ kđông’. Phung hđeh hlŏng hdĭp mda ti kđông, bi mguôp hlăm djăp mta klei hdĭp, klei mơak mñai hlăp mbul, mjuăt bi hriăm kơ knhuah dôk ƀơ̆ng huă, kơ knhuah hdĭp bi ênuah, thâo hdĭp hjăn. Kđông lŏ bi mguôp kjăp hŏng alŭ wăl, hŏng găp djuê lehanăn sang hră anôk di amuôn hriăm. Hdră atăt adei nao sang hră, mơ̆ng dŭm boh kđông kahan răng mgang knông lăn čar Quảng Nam lŏ đru ba truh 164 čô hđeh hriăm hră mâo klei hdĭp dleh dlan hlăm anăn mâo 6 čô hđeh Lao. Grăp čô hđeh dưi đru truh 500.000 prăk/mlan nao hriăm gưl 3. Hdră “Anak rông kahan răng mgang knông lăn” bi êdah ai tiê thâo khăp hĭn, mjing leh anôk knang kjăp kơ phung hđeh mâo klei hdĭp dlah dlan, mbĭt hŏng dŭm knơ̆ng dhar bruă, bruă sang čư̆ êa alŭ wăl đru mđĭ klei thâo săng hlăm mnuih ƀuôn sang, lehanăn klei hdĭp mda digơ̆ ti knông lăn. Đại tá Hoàng Văn Mẫn, Pô ngă bruă kđi čar hlăm bruă Đảng kđông kahan răng mgang knông lăn čar Quảng Nam lač:

“Anei jing sa mta bruă yuôm bhăn êdi, kyua mơ̆ng bruă anei yơh hmei mâo đru leh jăk klei bi mguôp plah wah êpul kahan hŏng bruă sang čư̆ êa alŭ wăl, mâo klei bi mguôp hŏng dŭm boh sang hră mơar ksiêm yap hđeh dôk hlăm klei dleh dlan, čiăng mâo hdră đru dlăng ba, mjing anak rông kơ kahan răng mgang knông lăn. Mơ̆ng anăn đru kơ digơ̆ hriăm hră mơar, hdĭp mda jăk hĭn. Mơ̆ng hdră bi mguôp plah wah gưl bruă Đảng kđông kahan răng mgang knông lăn hŏng alŭ wăl lehanăn mnuih ƀuôn sang ti knông lăn nah dih lehanăn nah anei dưi mâo leh klei bi mguôp kjăp hĭn”.

        Hdră anak rông kahan răng mgang knông lăn, lehanăn bruă atăt adei nao sang hră, mơ̆ng kahan răng mgang knông lăn klă sĭt jing leh anôk jưh knang kjăp kơ phung hđeh êrĭt amĭ ama, phung hđeh hdĭp hlăm klei dleh dlan krĭng taih kbưi. Mgi dih phung hđeh anei srăng đĭ hriê kơ prŏng srăng mâo sa klei hdĭp jăk hĭn. Dŭm klei yăl dliê kơ Anak rông kahan răng mgang knông lăn lŏ hyuă kjăp hĭn leh klei thâo bi mguôp plah wah lĭng kahan răng mgang knông lăn hŏng mnuih ƀuôn sang hdĭp ti knông lăn./.