Hlăm anăn, hdră “mlan 3 krĭng knông lăn” gưl dlông mkŏ mjing ti 3 čar Lạng Sơn, Quảng Trị leh anăn Kiên Giang. Lu hnư mnơ̆ng tŭ dưn srăng mâo êpul mkŏ mjing mđup brei kơ êpul lĭng kahan răng mgang knông lăn, mnuih ƀuôn sang leh anăn phung hđeh, hđeh êdam êra ti knông lăn 3 čar Lạng Sơn, Kiên Giang leh anăn Quảng Trị msĕ si: mđup brei hnư mnơ̆ng kơ gŏ sang knŭk kna dlăng ba leh anăn phung hđeh sang hră mâo klei hdĭp dleh dlan, mkăp brei mjeh ana kram kơ klei bi hmô “kăt kram knông lăn Việt Nam”.

Boh nik jing ba yua dŭm hdră mkŏ mkra mâo ênoh êbeh 7,2 êklai prăk. knŏng ti čar Lạng Sơn, dŭm mta bruă bi hdơr kơ phung mâo bruă tŭ dưn, hluê ngă dŭm hdră bruă mơ̆ng hđeh êdam êra hŏng ênoh 4,7 êklai prăk. Sa mta bruă mâo mnuih ƀuôn sang hur har nao hgŭm jing klei mkă dlăng, hưn mdah, mbha êa drao amâo mâo mă bruă kơ 500 čô mnuih ƀuôn sang leh anăn phung hđeh mâo klei hdĭp dleh dlan ti ƀăng jang knông lăn Chi Ma, Lạng Sơn.